काठमाडौं । महिला अधिकारको विषयमा ट्वीट गरेको भन्दै एक महिलालाई ३४ वर्षको जेल सजाय सुनाइएको छ । साउदी अरेबियाकाे अदालतले ‘सल्मा अल शेहाब’ नाम गरेकी महिलालाई याे सजाय सुनाएकाे हाे ।
शेहाब बेलायतस्थित युनिभर्सिटी अफ लिड्समा विद्यावारिधि गर्दैछिन् । गएको जनवरीमा छुट्टीमा साउदी अरेबिया फर्किएकी उनलाई त्यहाँको सरकारले हिरासतमा राखेको छ ।
सामाजिक सञ्जालमार्फत सरकारको सार्वजनिक व्यवस्थालाई खलल पार्ने र राज्यको सुरक्षामाथि आँच आउने काम गरेको भन्दै उनलाई सुरुमा ६ वर्षको जेल सजाय सुनाइएको थियो ।
शेहाबले त्यतिबेला देशबाट निकाला गरिएका व्यक्तिहरुले राजनीतिक बन्दीमा परेकाहरुलाई रिहाइ गर्नुपर्ने माग राख्दै गरेको ट्वीट रिट्वीटमात्रै गरेकी थिइन् ।
अदालतले तोकेको ६ वर्षको जेल सजायमा शेहाब पुनरावेदनमा गएकी थिइन् ।
पुनरावेदनको बहसमा उल्टै उनले साउदीको साइबर अपराध र एन्टी–टेरोरिजमसँग सम्बन्धित कानून उल्लंघन गरेको भन्दै थप कडा सजाय हुनुपर्ने माग राखियाे ।
त्यसैका आधारमा उनलाई गएको अगस्ट ८ तारिखमा ३४ वर्ष जेल सजाय तोकियो ।
यो फैसला साउदी अरेबियामा महिला अधिकारकर्मीका लागि तोकिएको आजसम्मकै लामो सजाय हो ।
शेहाबलाई तोकिएको यो सजायले साउदीमा अधिकारकर्मीले खेपिरहेको अवस्थाको अर्को यथार्थ दर्शाएको छ ।