close

खल्तीका सीईओ भन्छन्ः विश्वकप टिभी प्याकेजको पैसा फिर्ता पाउनुपर्ने भए ढुक्क हुनुहोस्, आउँछ

टेकपाना टेकपाना

मंसिर ८, २०७९

खल्तीका सीईओ भन्छन्ः विश्वकप टिभी प्याकेजको पैसा फिर्ता पाउनुपर्ने भए ढुक्क हुनुहोस्, आउँछ

काठमाडौं । भुक्तानी सेवाप्रदायक कम्पनी खल्तीका प्रमुख कार्यकारी अधिकृत (सीईओ) विनय खड्काले रिफन्ड हुन बाँकी ग्राहकलाई पैसा फिर्ता हुनेमा ढुक्क रहन आग्रह गरेका छन् । कम्पनीको फेसबुक पेजमार्फत लाइभ आएका उनले यस्तो आश्वासन दिएका हुन् ।

सर्भरको सीमाले धान्ने भन्दा बढी ट्राफिक आउँदा विश्वकप सुरु हुँदाका केही दिन सिस्टममा समस्या आएको खड्काको भनाइ थियो । “आईओएसको मापदण्ड अनुसार सामान्य भन्दा बढी ट्राफिक आउँदा स्वतः रिजेक्ट हुन्छ,” उनले भने । केही सन्दर्भमा खल्तीमा भुक्तानी भइसक्दा समेत डीटीएच तथा आईपीटिभीमा प्याकेज एक्टिभेसन नभएको अवस्था समेत रहेको खड्काले बताए ।

“हाम्रो मात्र नभएर टेलिभिजन वितरक कम्पनीहरूको सर्भरको क्षमताले पनि उक्त ट्राफिक धान्न नसकेको अवस्था थियो,” उनले भने, “जसले गर्दा भुक्तानी सेवाप्रदायक र टेलिभिजन वितरकहरूको  सम्पूर्ण टिम सपोर्टमा लाग्नुपर्‍यो ।” तर अहिलेसम्म आइपुग्दा आफूहरूले लगभग सबै समस्या समाधान गरिसकेको खल्तीले जनाएको छ ।

“यदि तपाईँ कसैको रिफन्डिङ बाँकी छ भने ढुक्क भएर बस्नुहोस्, त्यो फिर्ता आउँछ । तपाईँको टिभी प्याकेज अझै पनि एक्टिभ भएको छैन भने खल्तीको सपोर्ट, ह्वाट्सएप, भाइबर जस्ता च्यानलहरूबाट पनि आफ्नो गुनासो टिपाउन सक्नुहुन्छ,” उनले भने ।

खल्ती नेपालका लागि फुटबल विश्वकप लाइभ प्रसारणको अफिसियल पार्टनरको रूपमा रहेको छ । विश्वकप सुरु हुनु अघिदेखि नै आफूहरूको तयारी चलिरहेको  भए पनि अदालती झमेलाका कारण पर्याप्त तयारी हुन नपाएको उनको स्पष्टोक्ति छ ।

“नेपालमा १२/१३ लाख आईपीटिभी कनेक्सन छन्,” उनले भने, “त्यसको ५० प्रतिशतले मात्रै एकै पटक भुक्तानीको प्रयास गर्दा आफ्ना लागि सामान्यभन्दा हजार गुणा बढी हुन पुग्छ । हाम्रो मात्र होइन, अन्य पेमेन्ट गेटवे र टिभी प्रदायक सबैको हकमा यो समस्या थियो ।”