close

सिङ्गल चार्जमा ३०७ किमि गुड्ने विद्युतीय बाइक, लिमिटेड एडिसन दुई घण्टामै ‘सोल्ड आउट’

टेकपाना टेकपाना

मंसिर १३, २०७९

सिङ्गल चार्जमा ३०७ किमि गुड्ने विद्युतीय बाइक, लिमिटेड एडिसन दुई घण्टामै ‘सोल्ड आउट’

काठमाडौं । भारतको स्टार्टअप कम्पनी अल्ट्रा भायलेट अटोमोटिभले एक पटकको चार्जमा ३०६ किमि गुड्ने विद्युतीय मोटरसाइकल सार्वजनिक गरेको छ । कम्पनीले लिमिटेड एडिसनको रूपमा एफ ७७ बाइक सार्वजनिक गरेको हो । 

कम्पनीले बाइकको मोडेल नम्बरको आधारमा सार्वजनिक गरेका ७७ ओटै बाइक दुई घण्टामै बिक्री भएको बताइएको छ । कम्पनीले यसका लागि अनलाइन बुकिङ खुला गरेको थियो । 

पहेलो रङ्गमा उपलब्ध भएको यो बाइक विशिष्ट तरिकाले निर्माण गरिएको छ । दुई भेरियन्टमा आएको एफ ७७ को अधिकतम गति १५२ किलाेमिटर प्रतिघण्टा रहेको छ । एफ ७७ बिजुली बाइक २.९ सेकेन्डमा शून्यदेखि ६० किमि तथा ७‍‌.८ सेकेन्डमा शून्यदेखि १०० किलोमिटर प्रतिघण्टाकाे गति पकड्न सक्छ । 

यो बाइकले १०० एनएम पीक टर्क उत्पादन गर्ने कम्पनीको दाबी छ। अल्ट्राभायलेट एफ ७७ हाेचाे वा अग्लाे दुवै उचाइ भएका मानिसले चलाउन मिल्ने गरि निर्माण गरिएकाे छ । यो बाइकमा ग्लाइड, कम्ब्याट र ब्यालिस्टिक गरी तीनवटा मोडहरू छन् । बाइकमा ७.१ किलोवाट आवर र १०.३ किलोवाट आवर  दुई ब्याट्री विकल्पहरू पाउन सकिनेछ। 

भारतकाे बैङ्गलाेरमा रहेको यो ईभी स्टार्टअप कम्पनीले जनवरी २०२३ को सुरुदेखि सहरी क्षत्रमा बाइकहरू उपलब्ध गराउने बताएको छ । यो बाइकको टप भेरियन्टको मूल्य चार लाख ५५ हजार भारतीय रुपैयाँ (सात लाख २८ हजार रुपैयाँ) रहेको छ । त्यस्तै बेस भरियन्टको मूल्य तीन लाख ८० हजार रुपैयाँ (छ लाख ८० हजार रुपैयाँ) राखिएको छ ।

फाइटर जेटको डिजाइनमा निर्माण गरिएको एफ ७७ बाइकमा कम्पनीले ८ वर्षको वारेन्टी दिने बताएको छ । दुई बाइक मध्ये स्ट्यान्डर्ड एफ ७७ मा ७.१ किलोवाट आवर ब्याट्री सहित २७ किलोवाट पर्मानेन्ट म्यागनेट एसी मोटर राखिएको छ । कम्पनीका अनुसार ३.४ सेकेन्डमै यो बाइक शून्य किलोमिटर प्रति घण्टाबाट ६० किलोमिटर प्रति घण्टामा एक्सिलिरेट हुनसक्छ ।

यो बाइकको बेस भेरियन्टको रेञ्ज २०६ किलोमिटर र टप भेरियन्टको रेञ्ज ३०७ किमी रहेको छ । जुन १४० किलोमिटर प्रतिघण्टामा गुड्ने कम्पनीको दाबी छ । स्ट्यान्डर्ड चार्जरबाट चार्ज गर्दा यो बाइक एक घण्टामा ३५ किलोमिटर सम्म गुड्न सक्ने बताइएको छ भने फास्ट चार्जरबाट एक घण्टा चार्ज गर्दा ७५ किलोमिटर सम्म गुड्न सक्छ।