close

लुना जीपीएसले तयार गर्‍यो १० भाषामा प्रयोग गर्न सकिने भेहिकल ट्रयाकिङ सिस्टम

टेकपाना टेकपाना

मंसिर १४, २०७९

लुना जीपीएसले तयार गर्‍यो १० भाषामा प्रयोग गर्न सकिने भेहिकल ट्रयाकिङ सिस्टम

काठमाडौं । भेहिकल ट्रयाकिङ सिस्टम निर्माता कम्पनी ‘लुना जीपीएस’ ले १० ओटा भाषामा प्रयोग गर्न सकिने सवारी साधन ट्रयाकिङका लागि आवश्यक प्रणाली तयार पारेको छ । यो प्रणालीले सवारी साधनलाई रियल टाइम ट्रयाकिङ गर्दै दुर्घटना भएको समेत जानकारी दिने जनाइएको छ । यसका साथै यो सिस्टममा ओभर स्पीड, गाडी जाम भए नभएको लगायतका जानकारी पनि प्राप्त गर्न सकिन्छ । 

चालिस भन्दा बढी फिचर रहेको यो भेहिकल ट्रयाकिङ सिस्टम अंग्रेजी, नेपाली, नेवारी, थारु, डोटेली, मैथली, भोजपुरी, लिम्बू जस्ता १० भाषामा प्रयोग गर्न सकिनेछ । पहिलो चरणमा यो सिस्टम अंग्रेजी र नेपाली भाषामा मात्र उपलब्ध भएपनि चाँडै अन्य भाषामा समेत उपलब्ध हुने कम्पनीले जनाएको छ ।

यो सिस्टममा नेपाली पात्रो रहेको हुँदा अरु भन्दा भिन्न र सहज रहेको दावी कम्पनीको छ । कम्पनीका अनुसार यो सिस्टममा विद्यालयका लागि ‘जियो फेन्सिङ’ फिचर पनि उपलब्ध रहेको छ । जसले अभिभावकलाई आफ्नो बालबालिका विद्यालयबाट आउँदै गरेको वा गाडी घर छेउमा पुगेको जानकारी मोबाइलमा नोटिफकेसन, ईमेल, एसएमएसमार्फत जानकारी उपलब्ध हुनेछ ।

ठूलो सवारी साधनका लागि यो सिस्टममा तेल मापन सेन्सर रहेको छ । जसले गाडीमा कति इन्धन प्रयोग भयो, कहाँ कहाँ तेल हालियो जस्ता सम्पूर्ण जानकारी दिने जनाइएको छ । यसका साथै बाइकमा समेत यो प्रणाली जडान गर्न सकिने जनाइएको छ ।

यो प्रणाली बाइकमा जडान गरी बाइक कहाँ छ ? कति को स्पीडमा छ ? पछिल्लो एक हप्तामा कहाँ कहाँ गुड्यो, कहाँ रोकियो कति समय रोकियो, कुन ठाउँमा ओभर स्पीडमा थियो लगायतका जानकारी लिन सकिने कम्पनीको भनाई छ ।