क्यान इन्फोटेकमा 'प्रविधि उद्योग र एकेडेमियाबीच अन्तर' विषयमा सेमिनार हुँदै

काठमाडौं । कम्प्युटर एसोसियन अफ नेपाल महासंघ (क्यान महासंघ) को आयोजनामा आउँदो माघ २२ देखि ६ दिनसम्म राजधानीको भृकुटीमण्डपमा २८औं संस्करणको क्यान इन्फोटेक २०२३ हुँदैछ । यो अवसरमा सूचना प्रविधिसम्बन्धी बृहत् प्रदर्शनीका साथै 'क्यान इन्फोटेक सेमिनार २०२३' पनि हुने भएको छ ।

क्यान महासंघले 'कोड फर चेन्ज'सँग सहकार्य गरी यस्तो सेमिनार गर्न लागेको हो । यसअन्तर्गत माघ २५ देखि माघ २८ गतेसम्म हरेक दिन फरक-फरक विषयमा सरोकारवालाहरूबीच छलफल एवं अन्तर्क्रिया हुने क्यान महासंघका महासचिव चिरञ्जीवी अधिकारीले जानकारी दिए ।

उनका अनुसार माघ २५ अर्थात्  बुधबार 'प्रविधि उद्योग र एकेडेमियाबीच अन्तर' विषयमा पहिलो सेमिनार आयोजना हुनेछ ।

नेपाल पर्यटन बोर्डको हलमा दुई घण्टासम्म हुने सो सेमिनारमा नेपाल दूरसञ्चार प्राधिकरणकी उप-निर्देशक तथा सेन्टर फर साइबर सेक्युरिटी एन्ड रिसर्च इनोभेसन (सीएसआरआई)की उपाध्यक्ष रोजा किरण बासुकला, स्मार्ट च्वाइस टेक्नोलोजी लिमिटेड (एससीटी)का प्रमुख कार्यकारी अधिकृत (सीईओ) नारायण प्रकाश भुजु, टेक्सास कलेजका प्रिन्सिपल भेषराज पोखरेल, त्रिभुवन विश्वविद्यालयका उप-प्राध्यापक नवराज पौडेल, नेपाल सरकारका आईटी निर्देशक सुवास ढकाल र र कोड फर चेन्जका अध्यक्ष निराजन क्षेत्री वक्ताका रूपमा सहभागी हुँदै छन् । 

कार्यक्रममा वर्तमान शिक्षा प्रणाली, आईटी बजारको माग र आवश्यकता, उद्योग र शिक्षण संस्थाबीच देखिएको ग्याप, राज्यका नीति तथा कार्यक्रम लगायतका विषयमा छलफल हुनेछ । 

‘विद्यार्थीहरूलाई शिक्षण संस्थाले गर्ने अभ्यासहरूमा के छुटिरहेको छ भन्ने कुरा स्पष्ट पार्न कार्यक्रम उपयोगी हुने देखिएको छ,' कार्यक्रम संयोजक निराजन क्षेत्रीले  भने, ‘त्यस्तै प्रविधि कम्पनीहरूमा काम गर्न के-के कुरा आवश्यक पर्छ भन्ने कुरा विद्यार्थीलाई देखाउन पनि छलफलले सहयोग गर्नेछ ।’

सेमिनारमा १५० बढीको सहभागिता हुने बताइएको छ । यसअन्तर्गत  कार्यक्रममा सूचना प्रविधि क्षेत्रका विद्यार्थी, उद्यमी, पेशाकर्मी तथा प्रविधिप्रेमी जोसुकै आउनसक्ने कार्यक्रम संयोजक क्षेत्रीले बताए ।

पछिल्लो अध्यावधिक: माघ १७, २०७९ १५:४५

टिप्पणीहरू