गुगल मेसेजमा आयो दुवैतर्फ च्याट डिलिट गर्ने सुविधा, अब पठाइसकेको सन्देश फिर्ता लिन सकिने

काठमाडौँ । गुगलले आफ्नो मेसेजिङ एप (Google Messages) मा ‘रिमोट डिलिसन’ (रिमोटबाटै मेसेज मेटाउने) सुविधा ल्याएको छ । प्रयोगकर्ताले आफूले पठाएको मेसेज प्राप्त गर्ने व्यक्तिको फोनबाट पनि मेटाउन सक्ने गरी कम्पनीले यो सुविधा ल्याएको हो ।

आरसीएस प्रविधिमा आधारित यो नयाँ फिचरको बेटा परीक्षण गत जनवरीदेखि सुरु गरिएको थियो । अहिले यो सुविधा व्यापक रूपमा उपलब्ध गराउन थालिएको कम्पनीले जनाएको छ । 

कम्पनीका अनुसार यो फिचरले प्रयोगकर्तालाई आफूले गल्तीले पठाएका वा पछि मेटाउन चाहेका मेसेज सच्याउने अवसर दिनेछ ।

यसअघि मेसेज मेटाउँदा ‘Delete for me’ (मेरो लागि मात्र मेटाउनुहोस्) भन्ने अप्सन मात्र उपलब्ध थियो । तर, अब यसमा ‘Delete for everyone’ (सबैका लागि मेटाउनुहोस्) भन्ने नयाँ अप्सन पनि थपिएको छ ।

यद्यपि, यो फिचरले सबै प्रयोगकर्ताका लागि समान रूपमा काम गर्न दुवैतर्फका प्रयोगकर्ताले आरसीएसलाई सपोर्ट गर्ने सफ्टवेयर प्रयोग गरिरहेको हुनुपर्छ । यो फिचर ग्रुप च्याट र एक-एकको कुराकानी दुवैमा उपलब्ध छ ।

यस सुविधाले धेरै प्रयोगकर्तालाई खुसी बनाए पनि यो कुनै गल्ती नगर्ने जादुयी उपाय भने होइन । सन्देश डिलिट गर्नुअघि कसैले त्यसलाई पढिसकेको वा स्क्रिनशट लिइसकेको हुन सक्छ । त्यसैले, कुनै पनि शंकास्पद सन्देश पठाउनुअघि दुईपटक सोच्नु राम्रो हुन्छ । 

पछिल्लो अध्यावधिक: साउन ३१, २०८२ १७:४०

टिप्पणीहरू