आगजनीले ध्वस्त सर्वोच्च अदालतको आईटी पूर्वाधार सञ्चालनमा, ४८ दिनपछि वेबसाइट पुनः सक्रिय

काठमाडौँ । जेनजी आन्दोलनका क्रममा आगजनी र तोडफोडका कारण बन्द भएको सर्वोच्च अदालतको सूचना प्रविधिसम्बन्धी प्रणाली ४८ दिनपछि पुनः सञ्चालनमा आएको छ ।

रामशाहपथस्थित सर्वोच्च अदालतको भवनमा आन्दोलनकारीले आगजनी गर्दा सोही भवनमा रहेको डिजिटल पूर्वाधार पूर्ण रूपमा क्षतिग्रस्त भएको थियो । प्रणाली पुनः सञ्चालनमा आएसँगै सर्वोच्च अदालतको वेबसाइट पनि सक्रिय भएको छ ।

रिकभरी साइटका रुपमा सर्वोच्चले हेटौँडामा समेत ब्याकअप प्रणाली विकास गरेको थियो । तर, त्यहाँ पनि आन्दोलनका क्रममा क्षति पुगेपछि सर्वोच्च अदालत डिजिटल रूपमा ‘ब्याकआउट’ भएको थियो । त्यस अवधिमा अदालतले बन्दीप्रत्यक्षीकरणसहितका केही रिट लिखित रूपमा मात्रै सञ्चालन गर्नुपरेको थियो ।

सर्वोच्चका अनुसार सोमबारसम्म डिजिटल डेटा सफलतापूर्वक रिकभर भएकाले सूचना प्रणाली पूर्वाधार सञ्चालनमा आएको हो । मंगलबारदेखि अदालतले मुद्दासम्बन्धी विवरणहरू पुनः डिजिटल माध्यमबाट उपलब्ध गराउने तयारी थालेको छ ।

वेबसाइट सञ्चालनमा आएसँगै अब अनलाइन मुद्दा दर्ता, पेसी सूची, फैसला भएका मुद्दाको पूर्णपाठ र प्रक्रियागत विवरण हेर्न सहज भएको सर्वोच्चले जनाएको छ । मुख्य सर्भर पुनःस्थापना भएपछि उच्च र जिल्ला अदालतका विवरणहरू पनि सहज रूपमा हेर्न सकिने भएको छ ।

जेनजी आन्दोलनका क्रममा सर्वोच्चसँगै यातायात व्यवस्था विभागको सर्भर पनि आगजनी र तोडफोडका कारण क्षतिग्रस्त भएको थियो । सर्वोच्चको सर्भर पुनः सञ्चालनमा आए पनि विभागको सर्भर भने अझै सञ्चालनमा आउन सकेको छैन ।

पछिल्लो अध्यावधिक: कात्तिक १०, २०८२ १८:१

टिप्पणीहरू