close

अब जहाज चढ्दा मोबाइल फोन एयरप्लेन मोडमा राख्नु नपर्ने, ईयूले दियो अनुमति

टेकपाना टेकपाना

मंसिर १९, २०७९

अब जहाज चढ्दा मोबाइल फोन एयरप्लेन मोडमा राख्नु नपर्ने, ईयूले दियो अनुमति

काठमाडौं । युरोपियन युनियन (ईयू)मा आवद्ध देशभित्र उडिरहेको विमानभित्र चाँडै नै यात्रुले मोबाइलबाट फोन गर्न र इन्टरनेट चलाउन पाउने भएका छन् । युरोपेली आयोगमा आबद्ध भई सञ्चालनमा आएका एयरलाइन्सहरूमा यस्ताे सुविधा थप्न लागिएकाे हाे ।

अब यात्रुले उडिरहेको विमानमा माेबाइल 'एरोप्लेन मोड'मा राख्नुपर्ने छैन । बीबीसीका अनुसार यो सेवा कसरी कार्यान्वयन हुन्छ भन्ने कुरा स्पष्ट रूपमा खुलाइएकाे छैन । युरोपियन युनियनभित्रका राष्ट्रलाई ३० जुन २०२३ भित्र विमानमा फाइभजी फ्रिक्वेन्सी ब्यान्ड उपलब्ध गराउन निर्देशन दिइएको छ ।

त्यसपछि उडिरहेको जहाजबाट यात्रुले फाेनकल र इन्टरनेट सेवा लिनसक्ने छन् । कतिपय विमान कम्पनीले हाल उडानका क्रममा इन्टरनेट सेवाकाे परीक्षण गरिरहेका छन् । तर, अन्य अवस्थामा भन्दा विमानमा इन्टरनेट सुस्त गतिमा चल्छ ।

विमानमा रहेका मानिसहरूको सम्पर्क जमिनसम्म पुर्‍याउन स्याटलाइट डिभाइसमा भर पर्नुपर्ने भएकाले इन्टरनेटकाे गति ढिलाे हुने गर्छ । तर नयाँ प्रणाली फाइभजी प्रविधिमा आधारित हुने भएकाले यसअघिकाे सेवाभन्दा राम्राे हुने चर्चा पनि छ ।

साथै याे प्रविधिले विमानमा कुनै समस्या नपार्ने भएकाले एयरप्लेन माेड युगकाे अन्त्य हुने दाबी पनि गरिएकाे छ ।