रोनाल्डो अनुबन्ध गरेपछि साउदी क्लबको इन्स्टाग्राम अकाउन्टमा फलोअर ओइरिए
पुस १६, २०७९ १४:३६
काठमाडौं । पोर्चुगिज स्टार क्रिस्टियानो रोनाल्डोलाई साउदी अरबको फुटबल क्लब अल-नासरले अनुबन्ध गरेपछि क्लबको इन्स्टाग्राम अकाउन्टमा फलोअरको तीव्र रूपमा बढेको छ ।
क्लबले ११ घण्टाअघि मात्रै रोनाल्डोलाई तीन वर्षका लागि अनुबन्ध गरेको आधिकारिक सूचना दिएको थियो । यसलगत्तै क्लबको इन्स्टाग्राम अकाउन्टमा फलोअर संख्या वृद्धि भइरहेकाे छ ।
इन्स्टाग्राममा ११ घण्टाअघि क्लबकाे फलोअर संख्या आठ लाख ६० हजारमात्रै थियो । अहिले यो संख्या बढेर ३३ लाखभन्दा बढी पुगेकाे छ ।
क्लबकाे अन्य सामाजिक सञ्जाल अकाउन्टमा पनि फलाेअर थपिएका छन् । रोनाल्डोले याे साउदी क्लबबाट वार्षिक १७७ मिलियन पाउन्डभन्दा बढी पारिश्रमिक पाउने बताइएकाे छ ।
पछिल्लो अध्यावधिक: पुस १६, २०७९ १५:५१
