वर्ल्डलिङ्क, डिशहोम, टेलिकम र सुबिसुका ग्राहक घट्दा नेपालको इन्टरनेट पहुँच ऋणात्मक

 

काठमाडौं । ठूला इन्टरनेट सेवा प्रदायक कम्पनीहरूका ग्राहक घट्न थालेका छन् । गएको वैशाख महिनामा  ठूला चार ओटा कम्पनीका ग्राहक घटेको नियामक नेपाल दूरसञ्चार प्राधिकरणको भर्खरै प्रकाशित तथ्याङ्कले देखाएको हो । 

प्राधिकरणका अनुसार फिक्स लाइन इन्टरनेट ग्राहक गुमाउने मुख्य कम्पनीहरूमा वर्ल्डलिङ्क, डिशहोम, नेपाल टेलिकम, सुबिसु र ब्रोडलिङ्क रहेका छन् । चैत देखि वैशाखसम्मको एक महिनाको अवधिमा वर्ल्डलिङ्कका १८ हजार ८८९ ग्राहक घटेका छन् । जुन सबैभन्दा बढी हो । 

त्यसपछि क्रमशः डिशहोमले ११ हजार २२, नेपाल टेलिकमले १० हजार २६२, सुबिसुले चार हजार ७५९ र ब्रोडलिङ्कले दुई हजार ५९६ ग्राहक गुमाएका छन् ।  त्यसो त यस अवधिमा अन्य कुनै पनि इन्टरनेट सेवा प्रदायकले उल्लेखनीय  सङ्ख्यामा नयाँ ग्राहक थप्न समेत सकेका छैनन् ।

प्राधिकरणका अनुसार सो अवधिमा सबैभन्दा धेरै नयाँ ग्राहक बनाउनेमा पाँच हजार ३१२ ग्राहकका साथ वेब सर्फर पहिलो नम्बरमा रहेको छ । दोस्रो नम्बरमा रहेको सीजी नेटले ४८२ ओटा नयाँ ग्राहक बनाएको छ । बाँकी भायानेट र क्लासिक टेकको ग्राहक सङ्ख्या यथावत् रहेको छ भने टेकमाइन्ड्सले तथ्याङ्क नै उपलब्ध नगराएको उल्लेख छ । 

ठूला इन्टरनेट सेवा प्रदायक कम्पनीले ग्राहक गुमाउँदा समग्र फिक्स ब्रोडब्यान्ड इन्टरनेटको पहुँच समेत ३७ हजार ७७८ अङ्कले घटेको छ । चैतमा २६ लाख ७३ हजार ४७१ घर परिवारमा फिक्स ब्रोडब्यान्ड इन्टरनेट पुगेको भए पनि वैशाखसम्म आउँदा घटेर २६ लाख ३५ हजार ६९३ सङ्ख्यामा खुम्चिन पुगेको छ । 

 

२०७९ चैतको तुलनामा २०८० वैशाखमा इन्टरनेट ग्राहक

सेवा प्रदायक	चैत २०७९	वैशाख २०८०	नयाँ ग्राहक
वर्ल्डलिङ्क	771462	752,573	-18,889
नेपाल टेलिकम	287190	276,928	-10,262
भायानेट	264083	264,083	0
सुबिसु	260153	255,394	-4,759
क्लासिक टेक	270033	270,033	0
सीजी नेट	46702	47,184	482
डिशहोम फाइबरनेट	240668	229,646	-11,022
वेब सर्फर	142135	147,447	5,312
टेक माइन्ड्स	115458	115,458	0
ब्रोडलिङ्क	65928	63,332	-2,596
अन्य	209659	213615	3956
जम्मा	2673471	2,635,693	-37,778

स्रोतः नेपाल दूरसञ्चार प्राधिकरण

पछिल्लो अध्यावधिक: भदौ ६, २०८० १४:३०

टिप्पणीहरू