अन्ततः गन्तव्यमा पुग्यो सूर्यको अध्ययन गर्न पठाइएको ‘आदित्य एल वन’, भारतलाई नयाँ सफलता
पुस २१, २०८० १७:१०
काठमाडौं । सूर्यको अध्ययनका लागि उडेको भारतीय यान आदित्य एल वन आफ्नो गन्तव्यमा प्रवेश गरेको छ । प्रक्षेपणपछि चार महिनाको यात्रा तय गर्दै आदित्य एल वन लेग्रेन्ज पोइन्ट वन (एल वन) पुगेको हो ।
एल वनमा पुग्न आवश्यक पर्ने अन्तिम कक्षमा आदित्य एल वन प्रवेश गरेको इसरोले पुष्टि गरेको छ । गन्तव्यमा आदित्य एल वनलाई पुर्याउन आज (शनिवार) यानमा भएको मसिन अन्तिम पटक जलाइएको थियो । त्यसपछि ६३ मिनेट २० सेकेन्डको उडान भर्दै यान पृथ्वीबाट करिब १५ लाख किलोमिटर टाढा रहेको एल वनको हलो कक्षमा प्रवेश गरेको हो ।
भारतीय प्रधानमन्त्री नरेन्द्र मोदीले सामाजिक सञ्जाल एक्समा पोस्ट गर्दै भारतले फेरि अर्को कोसेढुङ्गा बनाएको बताएका छन् । प्रधानमन्त्री मोदीले जटिल अन्तरिक्ष मिसन भारतीय वैज्ञानिकहरूको अथक प्रयासको परिणाम भएको जनाएका छन् । त्यस्तै उनले यो असाधारण उपलब्धि भएको उल्लेख गरेका छन् ।
India creates yet another landmark. India’s first solar observatory Aditya-L1 reaches it’s destination. It is a testament to the relentless dedication of our scientists in realising among the most complex and intricate space missions. I join the nation in applauding this…
— Narendra Modi (@narendramodi) January 6, 2024
आदित्य एल वनलाई गन्तव्यमा पुग्नअघिको सबैभन्दा चुनौतीपूर्ण भाग यसलाई कक्षमा प्रवेश गर्नु मानिएको थियो । जुन आज मात्रै सफलता पूर्वक सम्पन्न भएको छ ।
भारतले आफ्नो पहिलो सूर्य यानका रूपमा गत सेप्टेम्बर २ का दिन आदित्य-एल वन प्रक्षेपण गरेको थियो ।
पछिल्लो अध्यावधिक: पुस २१, २०८० १७:१९
