प्रविधिसँगै यसरी मनाउनुहोस् भ्यालेन्टाइन्स डे
माघ २७, २०८० १८:५
काठमाडौं । प्रणय दिवस अर्थात् भ्यालेन्टाइन्स डे । प्रेमी-प्रेमिकाको विशेष पर्व । युगल जोडीलाई झनै जोड्ने पुल बनिरहेको प्रविधिले तपाईँको यो विशेष समयलाई थप यादगार बनाउन सक्छ । यसै सन्दर्भमा प्रविधिसँगै कसरी भ्यालेन्टाइन्स डे मनाउन सकिन्छ भन्ने विषयमा चर्चा गर्दैछौंः
अनलाइन मार्फत कुराकानी
प्रविधिले भ्यालेन्टाइन्स डेमा पारेको सबैभन्दा ठूलो प्रभाव कुराकानीमा हो । इन्टरनेटको प्रयोग व्यापक हुनुअघि आफू उपस्थित नभइ प्रेम व्यक्त गर्ने माध्यम चिठीपत्र थिए । जसै सञ्चारका आधुनिक माध्यम अस्तित्वमा आए, प्रेम व्यक्त गर्ने शैली फेरिए ।
यसको उदाहरण विभिन्न सामाजिक सञ्जाल हुन् । अहिले आफ्नो प्रेमीसँग कुराकानी गर्ने सबैभन्दा सजिलो माध्यम नै सामाजिक सञ्जाल बनेको छ । चाहे त्यो टेक्स्ट होस्, भोइस मेसेज होस् अथवा भिडिओ कल । अथवा पोस्ट नै किन नहोस् । आफूले माया गरेको मान्छेसँग कुराकानी गर्ने सरल, सुरक्षित र सजिलो माध्यम सामाजिक सञ्जाल भएकाे छ ।
अझ मोबाइल फोनमार्फत आफ्नो प्रेमसँग लामो कुराकानी गरेको याद तपाईंको ताजै हुन सक्छ । इन्टरनेटका कारण नै ‘लङ डिस्ट्यान्स रिलेसनशिप’ सम्भव भएको छ । अझ विकासको चरणमा नै रहेको भर्चुअल रियालिटी प्रविधिले भ्यालेन्टाइन्स डे मनाउने शैली परिवर्तन गरिरहेको छ । भर्चुअल रूपमा सँगै चलचित्र हेर्ने, गीत सुन्ने जस्ता गतिविधि गरेर जोडीहरूले रोमान्टिक समय बिताउन सक्छन् ।
ई-कमर्स र अनलाइन शपिङ
प्रविधिले भ्यालेन्टाइन्स डेलाई प्रभाव पारेको अर्को तरिका हो- ई-कमर्स, अनलाइन शपिङ । ई-कमर्स वेबसाइट र मोबाइल एपहरूको उदयसँगै प्रियजनका लागि उपहार किन्न सजिलो भएको छ ।
चाहे त्यो फूलको गुच्छा होस्, चकलेटको बाकस होस् अथवा गरगहना । घर बाहिर नगइकनै आफ्नो मायालुका लागि उपहार खरिद गर्न सक्नुहुन्छ । प्रणय दिवस सम्बन्धी सामग्रीहरू पसलमा गएर किन्न नसक्नेहरूका लागि यो सुविधा पनि हो ।
यही सुविधालाई थप विस्तार गर्न अनलाइन शपिङ प्लेटफर्महरूले विभिन्न उपहारहरू राख्ने गरेका छन् । जसमा अधिक पाटोलाई पनि खुकुलो बनाउन उनीहरूले विभिन्न छुट ल्याइरहेका हुन्छन् ।
प्रविधि सम्बन्धी सामग्री उपहार
प्रविधिले भ्यालेन्टाइन्स डेलाई प्रभाव पार्ने मात्र नभएर यसमा दिइने उपहारहरूमा समेत स्थान बनाइरहेको छ ।
अहिलेको समयमा आफ्नो मायालुलाई फोन, स्मार्टवाच, इयरबड जस्ता उपहार दिनु सामान्य भइसकेको छ ।
सम्बन्धलाई रोमान्टिक बनाउने, तर व्यवहारिक उपहारहरू दिने प्रयास गर्नुहोस् ।
भर्चुअल अनुभव
पछिल्ला केही वर्षयता भर्चुअल अनुभव निकै बढेको छ । र यसबाट भ्यालेन्टाइन्स डे पनि अछुतो छैन । चाहे यो भर्चुअल कुकिङ क्लास होस् वा भर्चुअल एस्केप रुम, तपाईंले घरमै बसेर अनौठो र यादगार अनुभवहरूको आनन्द आफ्नो प्रेमसँग लिन सक्नुहुन्छ ।
अहिले भर्चुअल अनुभवलाई रोमाञ्चक बनाउने विभिन्न तरिकाहरू विकास भएका छन् ।
अन्त्यमा...
यदि तपाईं पनि भ्यालेन्टाइन्स डेको अवसरमा आफ्नो प्रेम कथामा प्रविधि घुसाउन चाहनुहुन्छ भने थुप्रै क्षेत्र छन् । भर्चुअल रियालिटीमार्फत प्रेम पत्र पठाउने काम होस् या स्मार्ट स्पिकरमा रोमान्टिक प्लेलिस्ट शेयर गर्ने होस्, प्रविधिले तपाईंको प्रेम सम्बन्धलाई अझ विशेष अवश्य बनाउने छ । र, यसका लागि अरू धेरै तरिकाहरू छन् ।
सम्झनु पर्ने एउटा कुरा, प्रविधि र वास्तविक जीवनबीच सन्तुलन कायम गर्न सिक्नुहोस् । प्रविधिले एक-अर्काबीच जोडिन, सम्पर्कमा रहिरहन सजिलो बनाएको छ । तर व्यक्तिगत अन्तरक्रिया र प्रत्यक्ष भेटघाटका लागि समय निकाल्नु पनि उत्तिकै महत्त्वपूर्ण छ ।
पछिल्लो अध्यावधिक: माघ २७, २०८० १९:२९
