च्याटजीपीटीलाई टक्कर दिन आएको चिनियाँ एआईमा साइबर हमला, रजिस्ट्रेसन बन्द

काठमाडौं । च्याटजीपीटीको प्रतिद्वन्द्वी डिपसिकले साइबर आक्रमणका कारण अस्थायी रूपमा नयाँ प्रयोगकर्ताको रजिस्ट्रेसन सीमित गर्ने घोषणा गरेको छ । कम्पनीले आफ्नो एआई असिस्टेन्टको लोकप्रियता अचानक बढेसँगै सेवा प्रणालीमा समस्या उत्पन्न भएकाले यस्तो कदम चालेको बताएको छ ।

डिपसिक सोमबार अमेरिकी एप्पल एपस्टोरमा सबैभन्दा बढी डाउनलोड हुने निःशुल्क एपको सूचीमा पहिलो स्थानमा पुगेको थियो । यसकै कारण प्रयोगकर्ताहरूले एप्लिकेसन प्रोग्रामिङ इन्टरफेस (एपीआई) र वेबसाइटमा लगइन गर्न कठिनाइ सामना गर्नुपरेको कम्पनीले जानकारी दिएको छ ।

सोमबार भएको लगइन समस्या पछिल्लो ९० दिनकै सबैभन्दा लामो थियो । अहिले समस्या समाधानका प्रयास भइरहेको र हालका लागि केवल ईमेल अकाउन्ट वा चिनियाँ मोबाइल नम्बर प्रयोग गरेर मात्र नयाँ दर्ता गर्न सकिने व्यवस्था गरिएको छ ।

डिपसिकले हालै निःशुल्क एआई असिस्टेन्ट सार्वजनिक गरेको छ, जसले अन्य एआई मोडेलहरूको तुलनामा कम डाटा प्रयोग गर्ने र लागतमा किफायती रहेको दाबी गरिएको छ । कम्पनीले यसको प्रभावले एआई क्षेत्रमा नयाँ मानक स्थापित गर्ने सम्भावना रहेको पनि जनाएको छ ।

यो एप डिपसिक-भी३ (DeepSeek-V3) नामक ओपन-सोर्स मोडेलद्वारा सञ्चालित छ । कम्पनीका अनुसार यो मोडेल एड्भान्स क्लोज्ड-सोर्स मोडेलहरूसँग प्रतिस्पर्धा गर्न सक्षम छ ।

डिपसिकको लोकप्रियताले सिलिकन भ्यालीमा गहिरो धक्का पुगेको छ । यसले अमेरिकाको एआई अग्रता र चीनको उन्नत चिप विकास क्षमताबीच प्रतिस्पर्धा झन् चर्किएको देखाएको छ ।

डिपसिकको लोकप्रियताका कारण सोमबार एनभिदिया र ओराकलको शेयर मूल्यमा गिरावट आएको थियो । यस्ता एआई मोडेलहरूलाई प्रशिक्षण दिन उन्नत चिपहरूको आवश्यकता पर्छ । तर, चीनमा यी चिपहरूको निर्यातमा रोक लगाउन अमेरिकाले २०२१ देखि प्रतिबन्ध लगाउँदै आएको छ ।

डिपसिकका अनुसन्धानकर्ताहरूका अनुसार यो मोडेललाई ट्रेन गर्न एनभिदिया एच८०० चिपहरू प्रयोग गरिएको छ, जसमा ६०  लाख अमेरिकी डलरभन्दा कम खर्च भएको थियो । कम लागतमा तयार गरिएको यो मोडेलले अमेरिकी प्रविधि निर्यात प्रतिबन्धहरूको प्रभावमाथि पनि प्रश्न उठाएको छ ।

डिपसिक एआई सन् २०२३ मा हाङझाउमा स्थापना भएको सानो स्टार्टअप हो । यस कम्पनीलाई अमेरिकी प्रविधि उद्योगले अत्याधुनिक अमेरिकी मोडेलहरूलाई टक्कर दिने क्षमता राख्ने भन्दै प्रशंसा गरेको छ ।

डिपसिकको एआई मोडेलले कम लागत र सीमित स्रोतमा पनि उच्च क्षमता प्रदर्शन गर्दै विश्वभर एआई प्रविधिमा नयाँ सम्भावनाको ढोका खोलिरहेको छ । यद्यपि, यसले चीन र अमेरिकाबीचको प्रविधि प्रतिस्पर्धालाई थप तातेको छ ।

पछिल्लो अध्यावधिक: माघ १५, २०८१ १५:४४

टिप्पणीहरू