एलन मस्कको ग्रोक एआईमा अब विज्ञापन देखिने
साउन २२, २०८२ २०:४८
काठमाडौँ । एलन मस्कले एक्सको आर्टिफिसियल इन्टेलिजेन्स (एआई) च्याटबट ग्रोकमा विज्ञापन राख्ने घोषणा गरेका छन् । एक्सको विज्ञापन व्यवसायलाई सुदृढ पार्ने र ग्रोकबाट आम्दानी गर्ने उद्देश्यका साथ उनले यो कदम चालेका हुन् ।
गत जुलाईमा प्रमुख कार्यकारी लिन्डा याकारिनोको बहिर्गमनपछि एक्सको विज्ञापन व्यवसाय एआईको माध्यमबाट अगाडि बढाउने मस्कको योजना छ । बुधबार विज्ञापनदाताहरूसँग एक्समा प्रसारित लाइभ छलफलका क्रममा उनले मार्केटरहरूलाई ग्रोकका सुझावहरूमा आफ्नो विज्ञापन देखाउन अनुमति दिइने बताए । ग्रोक मस्कको एआई स्टार्ट-अप एक्सएआई द्वारा विकसित गरिएको हो ।
"अहिलेसम्म हाम्रो ध्यान ग्रोकलाई विश्वको सबैभन्दा स्मार्ट र सही जानकारी दिने एआई बनाउनमा केन्द्रित थियो र मलाई लाग्छ हामी यसमा धेरै हदसम्म सफल भएका छौँ । अब हामी ती महँगा जीपीयूहरूको पैसा कसरी तिर्ने भन्नेतर्फ ध्यान दिनेछौँ," मस्कले भने ।
"यदि एक प्रयोगकर्ताले कुनै समस्या समाधान गर्न खोजिरहेको छ भने त्यस बिन्दुमा विशिष्ट समाधानको विज्ञापन दिन उचित हुनेछ ।" मस्कले एक्सको विज्ञापन प्रक्रियालाई थप स्वचालित बनाउने र एक्स एआईको प्रविधि प्रयोग गरेर विज्ञापनको प्रभावकारिता सुधार गर्ने योजना पनि रहेको बताए ।
एक्सले हालैका दिनहरूमा प्रिमियम सब्सक्रिप्सन मार्फत आफ्नो आम्दानी विविधीकरण गर्दै आएको छ । यद्यपि मस्क मेटा, ओपनएआई र गुगल जस्ता प्रतिद्वन्द्वीहरूसँगको महँगो एआई दौडमा प्रतिस्पर्धा गर्न तीव्र रूपमा लगानी जुटाउने प्रयासमा छन् । लिन्डा याकारिनोको प्रस्थानपछि मस्क आफैले पुनः एक्सको नेतृत्व सम्हालेका छन् ।
पछिल्लो अध्यावधिक: साउन २२, २०८२ २०:४८
