टिकटक र रेडिटमा चल्यो नेताका सन्तानको विलासी जीवनयापन पर्दाफास गर्ने 'नेपो बेबी' ट्रेन्ड

काठमाडौँ । अङ्ग्रेजी गीतको धुनमा थरीथरीका आकर्षक इफेक्ट प्रयोग गरिएका भिडिओ जहाँ देखिन्छन् नेता र उनीहरूका सन्तानको कल्पनीय विलासी जीवनशैली । यी भिडिओ सँगसँगै जोडिएका छन् सामान्य जनताका सन्तानले देशमा भोगिरहेका दुःख, अभाव र विदेशमा पसिना बगाउनुपर्ने बाध्यताका कारुणिक दृश्य । यसरी सामाजिक सञ्जालका प्लेटफर्म टिकटक र रेडिटमा यतिखेर #NoMoreCorruption (भ्रष्टाचार चाहिँदैन) र #WakeUpChallenge (जागृत बनौँ अभियान) जस्ता ह्याशट्यागसहित नेताका सन्तानको विलासी जीवनशैली पर्दाफास गर्ने एउटा अभियान चलेको छ ।

यो अभियान केवल केही मनोरञ्जनात्मक भिडिओमा मात्र सीमित छैन । यसले नेताका सन्तानले प्रवर्द्धन गरेका ब्रान्डहरू बहिस्कार गर्ने, उनीहरूलाई सामाजिक सञ्जालबाट अनफलो गर्ने (पछ्याउन छाड्ने), विलासी जीवनयापनको स्रोत के हो भन्दै कमेन्ट गर्ने जस्ता कामलाई समेत प्रोत्साहन गरिरहेको छ । यी भिडिओ र पोस्टमा देशका दर्दनाक दृश्यहरू देखाइन्छन् । 

खासगरी रोजगारीका लागि विदेशिनुपर्दा त्रिभुवन अन्तर्राष्ट्रिय विमानस्थलमा परिवारसँग छुट्टिएको कारुणिक दृश्य, विदेशमा ज्यान गुमाएर काठको बाकसमा फर्किएको शव र गाउँघरमा अझै पनि तुइन चढेर जोखिमपूर्ण तरिकाले खोला तर्नुपर्ने कष्टकर जीवनयापनका तस्वीर यत्रतत्र छरिएका छन् ।

‘यो मधेशी र पहाडी वा तल्लो, माथिल्लो, आर्य वा मङ्गोलियनबिचको कुरा होइन । यो नेपाली र भ्रष्ट नेताबिचको कुरा हो । उनीहरूलाई बहिष्कार गरौं । ट्रेन्ड पछ्याऔं’ भन्दै यस अभियानलाई अगाडि सारिएको छ ।