निःशुल्क विश्वकप लाइभ हेर्ने लोभमा ठगिए ११५ जना नेपाली, गुम्यो २ करोड २९ लाख रुपैयाँ

काठमाडौं । विश्वकप फुटबल निःशुल्क हेर्न पाइने प्रलोभनमा परेर हानिकारक सफ्टवेयर (मालवेयर) इन्स्टल गर्दा ११५ जना नेपालीले आफ्नो ठुलो धनराशि गुमाएका छन् । विश्वकपका खेलहरू विना शुल्क हेर्न पाइने दाबी गरिएका भ्रामक विज्ञापन र शंकास्पद एपहरूको विश्वास गर्दा प्रयोगकर्ताहरू साइबर ठगीको सिकार भएका हुन् ।

नेपाल प्रहरीको साइबर ब्युरोका अनुसार यसरी ठगीमा परेका ११५ जना पीडितले हालसम्म ब्युरोमा आधिकारिक उजुरी दर्ता गराएका छन् । ब्युरोका प्रवक्ता एवं प्रहरी उपरीक्षक (एसपी) दिलीपकुमार गिरीले प्राप्त उजुरीहरूको विवरण दिँदै पीडितहरूको कुल दुई करोड २९ लाख रुपैयाँभन्दा बढी रकम ठगिएको जानकारी दिए ।

“विश्वकप निःशुल्क देखाउने बहानामा फैलाइएका भ्रामक विज्ञापनको पछि लागेर प्रयोगकर्ताले आफ्ना उपकरणमा मालवेयर इन्स्टल गरेको पाइयो,” प्रहरी उपरीक्षक गिरीले भने, “यही असावधानीका कारण ११५ वटा उजुरीबाट संकलित तथ्याङ्क अनुसार दुई करोड २९ लाख रुपैयाँ ठगी भएको देखिएको छ ।”

ब्युरोका अनुसार ठगहरूले अनधिकृत लिङ्क वा एपमार्फत प्रयोगकर्ताको मोबाइल तथा कम्प्युटरमा पहुँच बनाएर संवेदनशील विवरण (डेटा) र बैंक खाताको जानकारी चोरी गर्ने गरेका थिए । यही प्राविधिक छिद्रको प्रयोग गरी उनीहरूले बैंक खाताबाट रकम सुरक्षित रूपमा आफ्नो नियन्त्रणमा लिने गरेको अनुसन्धानले देखाएको छ ।

यद्यपि, पछिल्ला केही सातायता भने यस प्रकृतिको ठगीसम्बन्धी नयाँ उजुरी परेको छैन । हाल उजुरी दिने पीडितको सङ्ख्या शून्य रहेको प्रवक्ता गिरीले बताए । साइबर ब्युरोले अपरिचित लिङ्कहरू क्लिक नगर्न र अनधिकृत एपहरू डाउनलोड नगर्न सर्वसाधारणलाई पुनः सचेत गराएको छ ।

पछिल्लो अध्यावधिक: असार १५, २०८३ १९:२१

टिप्पणीहरू