पत्रकारलाई ल्यापटप र क्यामेरा खरिदमा अनुदान दिँदै प्रेस काउन्सिल
माघ ७, २०८० १०:२३
काठमाडौं । प्रेस काउन्सिल नेपालले पत्रकारलाई ल्यापटप र क्यामरा खरिदमा अनुदान दिने भएको छ । आइतबार एक सूचना प्रकाशित गर्दै काउन्सिलले मिडिया विकास कोषको स्वीकृत नीति एवं बजेट तथा कार्यक्रमअनुसार आर्थिक वर्ष २०८०-०८१ का लागि अनुदान कार्यक्रम तय गरेको हाे ।
यसअनुसार ३० ओटा ल्यापटप र ६ ओटा क्यामेरा खरिदमा ३० देखि ४० प्रतिशतसम्म अनुदान दिइने काउन्सिलले जनाएको छ ।
त्यस्तै काउन्सिलले १० जनालाई लेखनवृत्ति, सात जनालाई शाेधपत्र लेखन तथा एक सञ्चारकेन्द्र स्थापनामा पनि अनुदान दिने भएको छ ।
काउन्सिलका अनुसार एक पत्रकार वा सञ्चारगृहबाट एकमात्र सुविधाका लागि आवेदन दिन सकिनेछ ।
दुर्गम, स्थानीय सञ्चारमाध्यम र यसअघि उपलब्ध नभएका जिल्लालाई पहिलो प्राथमिकता दिइने भन्दै काउन्सिलले ३५ दिनभित्र आवेदन दिन अनुराेध गरेकाे छ ।
पछिल्लो अध्यावधिक: माघ ७, २०८० १०:२७
