close

स्टारलिंक जस्तै आफ्नै स्याटलाइट इन्टरनेट सेवा ल्याउने अमेजनको तयारी

टेकपाना टेकपाना

चैत २१, २०८१ १८:४४

स्टारलिंक जस्तै आफ्नै स्याटलाइट इन्टरनेट सेवा ल्याउने अमेजनको तयारी

काठमाडौं । एलन मस्कको स्टारलिंक स्याटलाइट इन्टरनेट सेवाजस्तै सुविधा उपलब्ध गराउने उद्देश्यले अमेजनले आफ्नो ‘प्रोजेक्ट कुपर’ अन्तर्गत नयाँ स्याटलाइट प्रक्षेपण गर्ने तयारी गरेको छ । द भर्जको रिपोर्टअनुसार अमेजनले पृथ्वीको तल्लो कक्षमा ८० स्याटलाइट प्रक्षेपण गर्ने योजना बनाएको हो । यसअन्तर्गत पहिलो चरणको प्रक्षेपण आगामी हप्ता हुने भएको छ ।

यो परियोजनाको लक्ष्य सन् २०२५ को अप्रिल ९ देखि उच्च गतिको इन्टरनेट सेवा सुरु गर्नु हो । यसअघि, कम्पनीले परीक्षणका रूपमा दुई स्याटलाइट सफलतापूर्वक प्रक्षेपण गरिसकेको छ ।

‘प्रोजेक्ट कुपर’ सेवा उपलब्ध गराउनका लागि अमेजनले एरियनस्पेस, ब्लु ओरिजिन र स्पेसएक्ससँग सहकार्य गरिरहेको छ ।

पहिलो चरणमा कम्पनीले पृथ्वीको तल्लो कक्षमा ३२०० भन्दा बढी स्याटलाइट प्रक्षेपण गर्ने योजना बनाएको छ । जबकि स्टारलिंकले अहिलेसम्म करिब ७,००० स्याटलाइट प्रक्षेपण गरिसकेको छ । स्टारलिंकले सन् २०१९ देखि स्याटलाइट प्रक्षेपण गर्दै आएको हो ।

अमेजनका अनुसार संसारभर अर्बौं मानिसहरू अझै पनि भरपर्दो इन्टरनेट पहुँचबाट वञ्चित छन् । कमजोर इन्टरनेट जडानका कारण सञ्चार, शिक्षा, स्वास्थ्य सेवा र अन्य आवश्यक सेवामा सीमित पहुँच हुँदा धेरै समुदाय आर्थिक अवसरबाट समेत वञ्चित हुने अमेजनको निष्कर्ष छ । यस्तोमा ‘प्रोजेक्ट कुपर’ ले उच्च गुणस्तरको इन्टरनेट सेवा सुलभ मूल्यमा उपलब्ध गराउने लक्ष्य राखिएको कम्पनीले जनाएको छ ।

पछिल्लो अध्यावधिक: चैत २२, २०८१ ९:१४