६ स्टार्टअप व्यवसायीलाई २ लाखका दरले पुरस्कृत गर्दै युवा परिषद्, यसरी दिनुहोस् अनलाइन आवेदन

काठमाडौँ । युवा तथा खेलकुद मन्त्रालय मातहतको राष्ट्रिय युवा परिषद्ले सूचना प्रविधि उद्यमी र स्टार्टअप व्यवसायीहरूका लागि विशेष पुरस्कार योजना सार्वजनिक गरेको छ । परिषद्को आर्थिक वर्ष २०८२/०८३ को स्वीकृत वार्षिक कार्यक्रम अन्तर्गत सूचना प्रविधि उद्यमी तथा स्टार्टअप व्यवसाय पुरस्कार प्रदान गर्न आवेदन आह्वान गरिएको हो ।

परिषद्ले जारी गरेको सूचना अनुसार यो कार्यक्रम अन्तर्गत देशभरबाट कूल १५ वटा सूचना प्रविधि तथा स्टार्टअप व्यवसायहरू छनोट गरिनेछ । छनोटमा परेका ती व्यवसायहरूलाई केन्द्रस्तरमा आयोजना गरिने विशेष प्रदर्शनीमा सहभागी गराइनेछ । उक्त प्रदर्शनीमा सहभागीमध्येबाट सबैभन्दा उत्कृष्ट हुने ६ जना व्यवसायीहरूलाई प्रोत्साहन स्वरूप जनही २,०००,००० (दुई लाख) रुपैयाँका दरले पुरस्कृत गरिने परिषद्ले जनाएको छ ।

यो कार्यक्रमले देशका सिर्जनशील युवा उद्यमीहरूलाई आफ्नो सीप र प्रविधि प्रदर्शन गर्ने एउटा ठुलो मञ्च प्रदान गर्ने र स्टार्टअप इकोसिस्टमलाई थप बलियो बनाउने विश्वास राष्ट्रिय युवा परिषद्ले लिएको छ ।

कसरी हुने सहभागी ?

सूचना प्रविधि वा स्टार्टअप व्यवसाय दर्ता गरी सञ्चालन गरिरहेका व्यवसायीहरू यो पुरस्कारका लागि आवेदन दिन योग्य हुनेछन् । व्यवसायी आवेदन दिने अन्तिम मितिसम्म १६ वर्ष पुरा भई ४० वर्ष ननाघेको हुनुपर्नेछ ।

योग्य युवा व्यवसायीहरूले परिषद्को आधिकारिक वेबसाइटमा रहेको अनलाइन फाराम पोर्टल (Online form Portal system: http://form.nyc.gov.np:81/) मार्फत आवेदन दिन सक्नेछन् । आवेदन दिने अन्तिम समयसीमा आगामी ११ वैशाख २०८३ राति १२:०० बजेसम्म तोकिएको छ ।

आवेदन परेका व्यवसायीहरूमध्येबाट सङ्क्षिप्त सूची (Shortlist) प्रकाशन गरिनेछ । कार्यक्रम हुने मिति र प्रदर्शनी हुने स्थानको जानकारी भने सङ्क्षिप्त सूची प्रकाशनको समयमा नै उपलब्ध गराइने परिषद्का उप-सचिव तारापति खरेलले जारी गरेको सूचनामा उल्लेख छ ।

विस्तृत जानकारीका लागि परिषद्ले ९८४५४७८१५२ वा ९८६३४६५५५६ मा फोन गर्न सकिने व्यवस्था मिलाएको छ । यदि अनलाइन फाराम भर्दा कुनै प्राविधिक समस्या आएमा ९८०३१६४६६४ मा सम्पर्क गरी प्राविधिक सहयोग लिन सकिनेछ ।

स्टार्टअप व्यवसायीहरूलाई आवेदन दिन सहज होस् भन्नका लागि परिषद्ले देशका विभिन्न उद्योग वाणिज्य संघहरूसँग समन्वय गरेको छ । व्यवसायीहरूले निम्न स्थानहरूबाट सहयोग लिन सक्नेछन्:

• नेपाल उद्योग वाणिज्य महासङ्घ, टेकु, काठमाडौँ (९८५१०५०८३८)

• उद्योग सङ्गठन मोरङ, विराटनगर (९८५२०८२०६०)

• वीरगन्ज उद्योग वाणिज्य सङ्घ, पर्सा (९८४५०३९६५५, ९८५११३७९२७)

• उद्योग सङ्घ मकवानपुर, हेटौँडा (९८५५०३५४१४)

• मकवानपुर उद्योग वाणिज्य सङ्घ, हेटौँडा (९८५५०६८३६४)

• व्यवसाय प्रवर्धन केन्द्र, पोखरा (९८५६०३४२३४)

• पोखरा उद्योग वाणिज्य सङ्घ, पोखरा (९८५६०१६९५२)

• बुटवल उद्योग वाणिज्य सङ्घ, बुटवल (९८५७०४४७७६, ०७१-५३०१४६)

• कैलाली उद्योग वाणिज्य सङ्घ, धनगढी (९८५८४२०५३७)

• सुर्खेत उद्योग वाणिज्य सङ्घ, वीरेन्द्रनगर (९८५८०२१२७८)

 

पछिल्लो अध्यावधिक: चैत २८, २०८२ १४:१९

टिप्पणीहरू