गुगलले ल्यायो स्क्रिन बिनाको नयाँ फिटनेस ट्रयाकर फिटबिट एयर, कसरी गर्छ काम ?

काठमाडौँ । गुगलको नयाँ फिटनेस डिभाइस फिटबिट एयर सार्वजनिक भएको छ । पछिल्लो समय स्मार्टवाचहरूको भिडमा हराइरहेको फिटबिटलाई गुगलले एक नयाँ र मौलिक स्वरूपमा ल्याएको हो ।

यो डिभाइसको सबैभन्दा मुख्य विशेषता भनेको यसमा कुनै पनि स्क्रिन छैन । स्क्रिन नभएको यो मिनिमलिस्ट डिजाइनमार्फत गुगलले सिधै प्रिमियम फिटनेस ट्रयाकर बजारमा ख्याति कमाएको हुपलाई कडा टक्कर दिने सङ्केत गरेको छ ।

फिटबिट एयर एउटा सानो पेबल (ढुङ्गाको साना टुक्रा जस्तो) आकारको सेन्सर मोड्युल हो, जसलाई विभिन्न प्रकारका ब्यान्डहरूमा फिट गर्न सकिन्छ । यसको मोटाइ केवल ८.३ एमएम र तौल ब्यान्ड बिना मात्र ५.२ ग्राम रहेको छ । ब्यान्डसहित यसको तौल केवल १२ ग्राम हुन्छ । जसले गर्दा प्रयोगकर्ताले यसलाई हातमा लगाएको महसुस समेत गर्दैनन् ।

यसमा स्क्रिन नराख्नुको मुख्य उद्देश्य प्रयोगकर्तालाई डिजिटल डिस्ट्रयाक्सन (नोटिफिकेशन र लाइट) बाट टाढा राख्दै उनीहरूको स्वास्थ्य डेटामा मात्र केन्द्रित गराउनु हो । सबै जानकारीहरू स्मार्टफोनमा रहेको नयाँ गुगल हेल्थ एपमार्फत हेर्न सकिन्छ ।

९९.९९ डलर (करिब १५ हजार रुपैयाँ) मूल्य तोकिएको यो सानो डिभाइसभित्र गुगलले शक्तिशाली सेन्सरहरू जडान गरेको छ । यसले २४ सै घण्टा मुटुको गति, रगतमा अक्सिजनको मात्रा, छालाको तापक्रममा आउने परिवर्तन र तनावको मापन गर्दछ ।

यसको सबैभन्दा महत्त्वपूर्ण यूएसपी भनेको यसमा उपलब्ध एट्रियल फाइब्रिलेसन (AFib) अलर्ट हो । मुटुको धड्कनमा आउने अनियमितता पत्ता लगाउने यो फिचर फिटबिट एयरमा निःशुल्क उपलब्ध छ । जबकि यसको प्रतिस्पर्धी हुपले यो फिचरका लागि वार्षिक करिब ३५९ डलरको महँगो सब्सक्रिप्सन शुल्क लिने गर्दछ ।

यसका साथै गुगलले यसमा जेमनाई एआईद्वारा सञ्चालित गुगल हेल्थ कोच पनि ल्याएको छ । यसले प्रयोगकर्ताको सुत्ने बानी, कसरत र स्वास्थ्य स्थिति विश्लेषण गरी व्यक्तिगत सल्लाह दिनेछ । प्रयोगकर्ताले जिममा रहेको वर्कआउट चार्टको फोटो खिचेर एपमा हालेमा एआईले त्यसलाई विश्लेषण गरी ट्रयाकिङमा समावेश समेत गर्न सक्छ ।

स्क्रिन नभएका कारण यसको ब्याट्री लाइफ निकै प्रभावकारी छ । एक पटकको फुल चार्जमा यो ७ दिनसम्म चल्छ । गुगलले यसमा फास्ट चार्जिङको सुविधा पनि दिएको छ । यसबाट मात्र ५ मिनेटको चार्जले एक दिनभरिको ब्याट्री ब्याकअप प्रदान गर्ने कम्पनीको दाबि छ । यसलाई फुल चार्ज गर्न भने ९० मिनेट लाग्छ ।

गुगलले फिटबिट एयरलाई केवल एउटा ट्रयाकरको रूपमा मात्र नभई लाइफस्टाइल उत्पादनको रूपमा प्रस्तुत गरेको छ । यसका लागि तीन प्रकारका ब्यान्डहरू उपलब्ध छन् । जसमध्ये एक हो, पर्फोमेन्स लुप । रिसाइकल गरिएका सामग्रीबाट बनेको यो ब्यान्ड बक्समै उपलब्ध हुन्छ । अर्को एक्टिभ ब्यान्ड खेलकुद र कसरतका लागि उपयुक्त सिलिकन ब्यान्ड हो भने तेस्रो मोडर्न ब्यान्डले ट्रयाकरलाई एउटा आधुनिक ब्रेसलेटको लुक दिन्छ ।

विशेष आकर्षणको रूपमा गुगलले चर्चित बास्केटबल खेलाडी स्टिफन करीसँग मिलेर स्टिफन करी स्पेसल एडिसन ब्यान्ड पनि ल्याएको छ । जसको मूल्य १२९.९९ अमेरिकी डलर (करिब १९,५०० रुपैयाँ) तोकिएको छ ।

बजारमा पहिलेदेखि नै लोकप्रिय रहेको हुप ५.० र फिटबिट एयरबिचको प्रतिस्पर्धा अब रोचक हुने देखिएको छ । हुपको ब्याट्री लाइफ १४ दिनभन्दा बढी छ र यसलाई हातबाट ननिकालिकन चार्ज गर्न सकिन्छ । तर हुप चलाउनका लागि अनिवार्य रूपमा महँगो वार्षिक सब्सक्रिप्सन लिनुपर्ने हुन्छ ।

अर्कोतर्फ फिटबिट एयरको सुरुवाती मूल्य कम छ र यसका धेरैजसो महत्त्वपूर्ण फिचरहरू निःशुल्क छन् । गुगलले ३ महिनाको लागि गुगल हेल्थ प्रिमियम ट्रायल पनि दिएको छ । त्यसपछि भने कोचिङ फिचरका लागि मासिक ९.९९ अमेरिकी डलर (करिब १५०० रुपैयाँ) शुल्क लाग्नेछ ।

फिटबिट एयर एन्ड्रोइड ११ र आईओएस १६.४ भन्दा माथिका सबै फोनहरूमा चल्नेछ । यसलाई गुगल पिक्सेल वाचसँग पनि एकसाथ जोड्न सकिन्छ । यसको प्रि-अर्डर सुरु भइसकेको छ भने मे २६ देखि यो बजारमा उपलब्ध हुनेछ ।

फिटबिट एपलाई गुगल हेल्थमा गाभेको गुगलले एआई कोचलाई एकीकृत गर्दै स्वास्थ्य प्रविधिमा आफ्नो प्रभुत्व जमाउन खोजिरहेको छ । ९९ डलरमा एआई कोच र एएफआईबी (AFib) जस्ता प्रिमियम फिचरहरू उपलब्ध गराएर गुगलले फिटबिटलाई पुनर्जीवन दिने प्रयास गरेको छ । स्मार्टवाचको नोटिफिकेसनबाट मुक्त हुन चाहने तर आफ्नो स्वास्थ्यको विस्तृत विवरण राख्न चाहने प्रयोगकर्ताका लागि फिटबिट एयर एउटा उत्कृष्ट विकल्प साबित हुन सक्छ ।

पछिल्लो अध्यावधिक: बैशाख २८, २०८३ ११:५८

टिप्पणीहरू