परीक्षा अगावै कक्षा १२ को प्रश्नपत्र र उत्तर सामाजिक सञ्जालमा लिक गर्ने थप २ जना पक्राउ

काठमाडौँ । कक्षा १२ को वार्षिक परीक्षाको गोपनीयता भङ्ग गरी परीक्षा सुरु हुनुभन्दा अगावै प्रश्नपत्र र उत्तर सार्वजनिक गरेको आरोपमा थप दुईजना पक्राउ परेका छन् । योसँगै यो प्रकरणमा पक्राउ पर्नेको संख्या चार पुगेको छ ।

नेपाल प्रहरीको साइबर ब्युरोले मंगलबार काठमाडौँको रत्नपार्कबाट गोरखाको भीमसेन थापा गाउँपालिका–५ घर भई रानीवन बस्ने २९ वर्षीय सन्तोष बन्जारा र गोरखाकै गण्डकी गाउँपालिका–३ घर भई वनस्थली बस्ने २० वर्षीय अश्विन अधिकारीलाई पक्राउ गरेको हो ।

यसअघि गत वैशाखमा सोही आरोपमा अन्य दुई जना पक्राउ परेका थिए । प्रहरीले सुर्खेत घर भई काठमाडौँ बस्ने ३७ वर्षीय निराजन शाही र धादिङ घर भई काठमाडौँ बस्ने ३० वर्षीय प्रेम कुमार श्रेष्ठलाई चाबहिलबाट नियन्त्रणमा लिएको थियो ।

ब्यूरोका अनुसार पक्राउ परेकाहरूले ‘Class 12 Management only’ नामक ह्वाट्सएप ग्रुप तथा फेसबुक मेसेन्जरमा विभिन्न ग्रुपहरू बनाएर परीक्षा सुरु हुनुभन्दा केही समय अगाडि नै उत्तरसहितको प्रश्नपत्र अनधिकृत रूपमा सार्वजनिक गरेका थिए । राष्ट्रिय परीक्षा बोर्डको आधिकारिक उजुरीका आधारमा ब्युरोले गरेको प्राविधिक विश्लेषण र अनुसन्धानबाट उनीहरूको संलग्नता पुष्टि भएको हो ।

ब्युरोका प्रवक्ता प्रहरी उपरीक्षक दिलीप कुमार गिरीले पक्राउ परेकाहरूमाथि विद्युतीय कारोबार ऐन, २०६३ अन्तर्गतको कसुरमा अनुसन्धान अगाडि बढाइएको जानकारी दिए ।

राष्ट्रिय परीक्षा बोर्डले गत वैशाख १४ गतेदेखि २७ गतेसम्म देशभर कक्षा १२ को परीक्षा सञ्चालन गरेको थियो । परीक्षाकै क्रममा प्रश्नपत्र बाहिरिएपछि बोर्डले छानबिनका लागि प्रहरीमा उजुरी दिएको थियो । यस प्रकरणमा संलग्न अन्य व्यक्तिहरूको पनि खोजी भइरहेको प्रहरीले जनाएको छ ।

 

पछिल्लो अध्यावधिक: जेठ ५, २०८३ १९:१

टिप्पणीहरू