वनएक्स बेट प्रकरणमा पक्राउ परेका कलाकार, युट्युबर तथा एजेन्टविरुद्ध अदालतमा मुद्दा दर्ता

काठमाडौं । अवैध अनलाइन सट्टेबाजी प्लेटफर्म वनएक्स बेटको प्रचार गरेको आरोपमा पक्राउ परेका कलाकार तथा युट्युबर विरुद्ध सोमबार जिल्ला अदालत काठमाडौंमा अभियोगपत्र दर्ता भएको छ । उनीहरुलाई प्रहरीले एक वर्षसम्म कैद र १० हजार रुपैयाँसम्म जरिवानाको माग सहित जिल्ला अदालतमा मुद्दा दायर गरेको हो ।

गत महिना वनएक्स बेटको एजेन्टका रूपमा सक्रिय भएको आरोपमा पक्राउ परेका दिनेश खड्का, अनिता धिताल लगायत १० जना युट्युबर तथा कलाकार विरुद्ध मुद्दा दर्ता भएको हो । जिल्ला सरकारी वकिल कार्यालयले एजेन्ट खड्का र धितालविरुद्ध ६४ करोड ९४ लाख २९ हजार रुपैयाँ विगो दाबी गरी अभियोग पत्र दायर गरेको छ ।

नेपाल राष्ट्र बैंक ऐन २०५८ को दफा ९५ अनुसार उनीहरुसँग विगो जफत गरेर ३ गुणासम्म जरिवाना वा ७ वर्षसम्म कैद वा दुवै सजाय हुन सक्नेछ । नेपालको मुलुकी अपराध संहिता २०७४ को धारा १२५ मा जुवा खेल्न वा सट्टाबाजी गर्नु नहुने व्यवस्था छ ।

टेकपानासँग कुरा गर्दै काठमाडौं उपत्यका अपराध अनुसन्धान कार्यालयका प्रमुख एसएसपी डा. मनोज केसीले उनीहरू विरुद्ध सोमबार मुद्दा दर्ता भई थुनछेक बहस भइरहेको बताए । जेठ ३२ र असार ८ गते कार्यालयले अनलाइन सट्टेबाजी प्लेटफर्म वनएक्स बेटकाे प्रचारमा संलग्न १० कलाकार तथा युट्युबरलाई पक्राउ सार्वजनिक गरेको थियो ।

पक्राउ पर्नेमा मरिचमान श्रेष्ठ (बल्छी धुर्वे), राजु पौडेल (राजु मास्टर) पवन खतिवडा (म्याकुरी) अलिस राई, जलन घर्तिमगर (जलन), गणेश देवकोटा (गणेश जीडी), सरोज घिमिरे (ढेडु बुढो), ‍बेगम नेपाली (भटभटे माइला), राज कुमार तामाङ रहेका थिए । उक्त अवैध सट्टेबाजी प्लेटफर्मको प्रचार गर्ने अन्य युट्युबरको खोजी भइरहेको एसएसपी केसीले जानकारी दिए ।

पछिल्लो अध्यावधिक: असार २५, २०८० १८:२३

टिप्पणीहरू