‘अनलाइनबाट समाचार हटाउने आदेश आएछ, पत्रिकामा छापिए जलाउने, रेडियो-टिभीमा आए फुटाउने हो ?’

काठमाडौँ । नेपाल कम्युनिस्ट पार्टी (एमाले) का नेता विष्णु रिजालले अनलाइन समाचार हटाउन अदालतले दिएको आदेशप्रति कटाक्ष गरेका छन् ।

नेपाल धितोपत्र बोर्डका अध्यक्ष सन्तोषनारायण श्रेष्ठको मागअनुसार काठमाडौँ जिल्ला अदालतले दुई अनलाइन मिडिया बिजमाण्डु डटकम र नेपालखबर डटकम लाई समाचार हटाउन आदेश जारी गरेपछि रिजालले आलोचना गरेका हुन् ।

उनले फेसबुकमा लेखेका छन्, “अनलाइनमा समाचार आएकाले हटाउन आदेश आएछ । त्यसो भए पत्रिकामा समाचार छापिएमा के गर्ने ? पत्रिका जलाउने श्रीमान्जी ? रेडियो-टिभीमा समाचार आएमा फुटाउने ?”

मंगलबार काठमाडौँ जिल्ला अदालतले धितोपत्र बोर्डका अध्यक्ष श्रेष्ठविरुद्ध प्रकाशित समाचारका कारण अपूरणीय क्षति हुनसक्ने भन्दै समाचार हटाउन र थप सामग्री प्रकाशित नगर्न अल्पकालीन अन्तरिम आदेश दिएको थियो । अदालतको सो आदेश अहिले सार्वजनिक वृत्तमा बहसको विषय बनेको छ ।

पछिल्लो अध्यावधिक: जेठ २८, २०८२ १८:५४

टिप्पणीहरू