जिमेल, ड्राइभ र क्यालेन्डर लगायतका एपको स्वरूप परिवर्तन, ग्रेडियन्ट डिजाइनमा देखिन थाले लोगो

काठमाडौँ । गुगलले आफ्ना वर्कस्पेस एपहरूको भिजुअल परिवर्तन गर्दै नयाँ रङ्गीन ग्रेडियन्ट आइकन सार्वजनिक गर्न थालेको छ । झन्डै ६ वर्षपछिको यो पहिलो ठुलो रिडिजाइन गर्न लागिएको हो ।

यस अन्तर्गत जिमेल, गुगल ड्राइभ, डक्स, शिट्स, क्यालेन्डर र टास्क जस्ता प्रमुख एपहरूको स्वरूप फेरिएको छ । यसअघि गुगलका आइकनहरूमा कम्पनीका चारवटा मुख्य रङ्गहरूलाई प्रयोग गर्ने नियम थियो । जसले गर्दा धेरैजसो आइकनहरू उस्तै देखिन्थे ।

तर नयाँ डिजाइनमा गुगलले त्यो कडा नियम हटाएर रङ्गहरूलाई एकआपसमा मिसाइएको 'सफ्ट ग्रेडियन्ट' लुक दिएको छ । यसले गर्दा प्रत्येक एपका आइकनहरू रङ्ग र आकारका आधारमा अझ स्पष्ट र पहिचान गर्न सजिलो बनेका छन् ।

धेरैजसो एपहरूबाट 'पेज कन्टेनर' (ब्याकग्राउन्ड शेप) हटाइएको छ । जसले गर्दा आइकनहरू पहिलेभन्दा ठुला र भिन्न देखिन्छन् । जिमेल एउटा मात्र यस्तो एप हो, जसले अझै पनि गुगलका चारवटै रङ्गहरू कायम राखेको छ । तर यसमा पनि ठोस रङ्गको सट्टा ग्रेडियन्टको प्रयोग गरिएको छ । यसको परिचित खाम आकारको M लोगो भने कायमै राखिएको भए पनि यसलाई ग्रेडियन्ट शैलीमा अझ आधुनिक बनाइएको छ ।

गुगल ड्राइभको नयाँ आइकनमा हरियो, पहेँलो र निलो रङ्गको प्रधानता छ भने पुरानो डिजाइनमा रहेको सानो रातो कुनालाई हटाइएको छ ।

क्यालेन्डर निलो रङ्गमा बढी केन्द्रित छ र पहिलेभन्दा निकै सफा देखिएको छ । गुगल मिटको आइकनमा अब पहेँलो रङ्गको ग्रेडियन्ट बढी प्रयोग गरिएको छ ।

डक्स, शिट्स र स्लाइड्सका आइकनहरू पहिलेको 'फ्ल्याट' (समतल) डिजाइनको सट्टा अब नरम रङ्गीन मिश्रणमा देखिएका छन् । किप र टास्क एपहरूलाई पनि गुगलले सरल र आकर्षक बनाएको छ ।

यो नयाँ आइकनहरू हाल गुगलको वेब एप लन्चर (वेबसाइटको माथिल्लो दायाँ कुनामा रहने मेनु) र क्रोमको 'न्यु ट्याब' पेजमा देखिन थालेका छन् । केही एपहरू (जस्तै गुगल किप र डक्स) को होमपेजमा पनि नयाँ लोगोहरू देखा पर्न थालेका छन् ।

भर्खरै प्राप्त जानकारी अनुसार यो अपडेट एन्ड्रोइड र आईओएस डिभाइसहरूमा पनि रोलआउट हुन सुरु भइसकेको छ । गुगल आई/ओ २०२६ को पूर्वसन्ध्यामा सुरु भएको यो परिवर्तन आगामी केही दिन वा हप्ताभित्र सबै प्रयोगकर्ताहरूका लागि पूर्ण रूपमा उपलब्ध हुने अपेक्षा गरिएको छ ।

प्रयोगकर्ताहरूले अहिले गुगलको होमपेजबाट नयाँ आइकनहरू देख्न सके पनि एपभित्र भने अझै केही समय पुरानै आइकनहरू देखिन सक्ने बताइएको छ । गुगलले बिस्तारै आफ्ना सबै प्लेटफर्ममा यसलाई अपडेट गर्दै लैजानेछ ।

 

पछिल्लो अध्यावधिक: जेठ ५, २०८३ ९:२८

टिप्पणीहरू