फेसबुक पेजमार्फत सस्तोमा आईफोन १३ प्रो पाइने प्रलोभन देखाएर ठग्ने व्यक्ति पक्राउ
भदौ ३१, २०७९ १४:२५
काठमाडौं । सामाजिक सञ्जाल फेसबुकमार्फत सस्तोमा आईफोन उपलब्ध गराउने भन्दै ठगी गर्ने एक व्यक्ति पक्राउ परेका छन् ।
फेसबुकमा ‘टी मोबाइल स्टोर’ पेज खोली उक्त पेजको दुरुपयोग गरी अनलाइन ठगी गरेको आरोपमा प्रहरीले सुनसरी इटहरी उपमहानगरपालिका ११ खनार बस्ने २३ वर्षीय प्रसिन चौधरीलाई बुधबार पक्राउ गरेको हो ।
चौधरीले उक्त पेजको दुरुपयोग गरी आईफोन १३ प्रो मोबाइल सेट सस्तो मूल्य एक लाख १५ हजार रुपैयाँमा उपलब्ध गराउने भन्दै प्रलोभनमा पारेर ठगी गरेको आरोप छ ।
उनले पीडितलाई भन्सार दस्तुर, डेलिभरी चार्ज बापत बिभिन्न ब्यक्तिको ईसेवा आईडी तथा बैंक खातामा रकम पठाउन लगाई ठगी गरेको बताइएको छ ।
उक्त घटनाको थप अनुसन्धानका लागि खटिएको प्रहरीले चौधरीलाई काठमाडौं महानगरपालिका ३१ नयाँ बानेश्वरबाट पक्राउ गरेको हो । उनलाई ठगी कसूरमा आवश्यक अनुसन्धान तथा कारवाहीका लागि जिल्ला प्रहरी परिसर काठमाडौं पठाइएको छ ।
पछिल्लो अध्यावधिक: असोज २, २०७९ २२:३४
