मेसेज पढेपछि स्वत: हराउने फिचर उपलब्ध गराउँदै ह्वाट्सएप
मंसिर २७, २०७९ १०:१७
काठमाडौं । मेसेजिङ एप ह्वाट्सएपले स्न्यापच्याटमा जस्तै मेसेज हेरेपछि आफै गायब हुने फिचर ल्याउने भएकाे छ । यसअन्तर्गत कसैले पठाएको मेसेज पाउने व्यक्तिले हेर्ने बित्तिकै स्वतः हराउने छ । साथै यसरी पठाएको मेसेज स्क्रिनशट गर्न, कपी तथा फर्वाड केही गर्न नसकिने जनाइएको छ ।
स्न्यापच्याटमा कुनै पनि मेसेज खोलेर पढ्यो वा च्याट क्लोज गर्यो भने उक्त मेसेज स्वतः हराउँछ । यो फिचर विभिन्न प्रयोजनका लागि उपयोगी हुने भन्दै कम्पनीले ह्वाट्सएपमा समेत उपलब्ध गराउने भएको हो ।
अहिले विकास भइरहेको यो नयाँ फिचर एन्ड्रोइडका लागि ह्वाट्सएपको बेटा भर्सन २.२२.२५.२० मा देखिएको समेत उल्लेख गरिएको छ । यसका साथै कम्पनी आफैंले पनि उक्त फिचर कस्तो देखिनेछ भन्ने स्क्रिनशट समेत सार्वजनिक गरेको छ ।
ह्वाट्सएपले यस फिचरको नाम 'डिसएपियरिङ मेसेज' नाम दिएको छ ।
यो फिचर इनेबल गरेर पठाएका मेसेज २४ घण्टा, सात दिन वा ९० दिनभित्र हराउने बनाउन सकिन्छ । यो फिचरले प्रयोगकर्ताको गोपनीयता अझ बढाउने कम्पनीको विश्वास छ ।
पछिल्लो अध्यावधिक: मंसिर २७, २०७९ ११:३२
