झण्डै १२ खर्ब लगानीमा विश्वभर इन्टरनेट सेवा दिँदै स्टारलिंक
असार १६, २०७८ १८:२७
काठमाडौं । करिब १० अर्ब अमेरिकी डलर लगानीमा स्टारलिंकले विश्वव्यापी रुपमा इन्टरनेट पुर्याउने भएकाे छ । मंगलबार आयोजित मोबाइल वर्ल्ड कंग्रेस कनफ्रेन्समा बोल्दै कम्पनी प्रमुख एलन मस्कले स्टारलिंक नेटवर्कको लागत करिब ५ अर्ब अमेरिकी डलरदेखि १० अर्ब अमेरिकी डलर (११ खर्ब ८८ अर्ब रूपयाँभन्दा बढी) सम्म पुग्नसक्ने बताएका छन् ।
आउँदो अगस्ट महिनादेखि पोलार रिजनबाहेक विश्वका अन्य क्षेत्रमा इन्टरनेट सेवा पुर्याउने उद्देश्यले तयार गरेको स्टारलिंक करिब एक दर्जन राष्ट्रमा सञ्चालन भइरहेको छ । मस्कका अनुसार हाल स्टारलिंकका करिब ६९,४२० प्रयोगकर्ताहरु छन् र आगामी एक वर्षमा यसका प्रयोगकर्ता करिब ५००,००० कट्ने उनको अनुमान छ ।
फाइबर र वायरलेस नेटवर्ककाे सुविधा नपाएका विश्वका करिब ५ प्रतिशत मानिसमा इन्टरनेट सेवा पुर्याउने कम्पनीकाे लक्ष्य छ । स्टारलिंकसँग सम्बन्धित भएर मस्कले दुई वटा देशसँग दुई ठूला सम्झौता उनले गरेका छन् । यद्यपि कार्यक्रममा उनले यस विषयमा थप जानकारी भने दिएनन् ।
स्टारलिंकमा थप अपग्रेडहरु गर्दै गएको बताउँदै उनले आगामी वर्षमा स्टारलिंक स्याटेलाइटको नयाँ संस्करण पनि सार्वजनिक गर्ने उनले बताए । सो नयाँ संस्करणमा भने इन्टरस्याटेलाइट लेजर लिंकको प्रयोग हुनेछ, जसले पोलार रिजनमा पनि इन्टरनेटको सुविधा पुर्याउन सक्ने बताइएकाे छ ।
-एजेन्सीकाे सहयाेगमा ।
पछिल्लो अध्यावधिक: असोज २, २०७९ २२:३५
