भिरबाट टेम्पो खसाएको घटनामा वन कार्यालयले पीडितलाई दियो ५ लाख क्षतिपूर्ति

काठमाडौं । कैलालीमा डिभिजन वन कार्यालयका कर्मचारीले सडक छेउबाट टेम्पो खसालेको घटनामा पीडित पक्षले पाँच लाख रुपैयाँ क्षतिपूर्ति पाएको छ । वन कर्मचारी र टेम्पो धनी पक्ष (घनश्याम धामी र उनकी पत्नी धनादेवी धामी)बिच सहमति जुटेपछि धामी दम्पतीले सो रकम प्राप्त गरेका हुन् ।

घटनाको छानबिन गर्न गठित समितिका संयोजक एवं सुदूरपश्चिम प्रदेश वन निर्देशक हेमराज विष्टले दुई पक्षबिच सहमति भएको जानकारी दिए ।

गत २९ जेठमा भीमदत्त राजमार्गअन्तर्गत कैलालीको चुरे क्षेत्रमा वनका कर्मचारीले धामी दम्पतीको टेम्पो भिरबाट खसालेका थिए । सो घटनाको भिडिओ सामाजिक सञ्जालमा भाइरल भएपछि सरकारी पक्षले गरिबमाथि अत्याचार गरेको भन्दै वन कर्मचारीको चौतर्फी आलोचना भएको थियो ।

आलोचनापछि डिभिजन वन कार्यालयले वन क्षेत्रभित्रको अतिक्रमण हटाउने क्रममा गुड्न नमिल्ने अवस्थामा रहेको टेम्पोलाई बल प्रयोग गरी पन्छाउन खोज्दा भौगोलिक विकटताका कारण अनियन्त्रित भई दुर्घटनावश भिरमा खसेको दाबी गरेको थियो । तर, टेम्पो धनी धनादेवी धामीले आफ्नो टेम्पो चालु अवस्थामै रहेको र जानाजानी खसालिएको भन्दै १० लाख रुपैयाँ क्षतिपूर्ति, भत्काइएका घरटहराको पुनर्निर्माण र होल्डिङ सेन्टरमा बासको व्यवस्था हुनुपर्ने माग राखेकी थिइन् ।

विवाद बढ्दै गएपछि सुदूरपश्चिम प्रदेशको उद्योग, पर्यटन, वन तथा वातावरण मन्त्रालयले प्रदेश वन निर्देशक विष्टको संयोजकत्वमा पाँच सदस्यीय छानबिन समिति गठन गरेको थियो । समितिलाई १० असारसम्मको म्याद दिइए पनि मंगलबार नै दुवै पक्षबिच सहमति जुटेको हो ।

निर्देशक विष्टले धामी दम्पतीले वन क्षेत्रभित्र घर-टहरा बनाएर बस्नु नियमविपरीत भए तापनि मानवीय संवेदना र कर्मचारीको व्यवहारलाई हेरेर क्षतिपूर्ति दिएको बताए । “वन क्षेत्रमा घर-टहरा बनाउने कानुन छैन । वन कार्यालयले पटक-पटक हटाउन आग्रह गर्दा पनि उहाँहरूले अटेर गर्नुभएको देखिन्छ,” विष्टले भने, “त्यस दिन कर्मचारीले आवेशमा आएर वा झोंकमा टेम्पो खसालेको देखियो ।”

उनले दुवै पक्षको कमजोरी रहेकाले मध्यमार्गी बाटो अपनाएर सहमति गराइएको बताए । “टेम्पो खसाल्नु कर्मचारीको गल्ती थियो भने गलत ठाउँमा व्यवसाय सञ्चालन गर्नु धामी दम्पतीको कमजोरी हो । छानबिनले यी दुवै पक्षलाई हेर्छ, तर भौतिक क्षति भएकाले पीडितलाई न्याय दिन क्षतिपूर्तिको व्यवस्था गरिएको हो,” विष्टले टेकपानासँग भने ।

टेम्पो भिरबाट खसालेको आरोपमा प्रहरीले १० जना वन कर्मचारीलाई पक्राउसमेत गरेको थियो ।

 

पछिल्लो अध्यावधिक: असार ९, २०८३ २१:१४

टिप्पणीहरू