काठमाडौं । टिकटक बन्दविरुद्ध परेको रिट ‘हेर्न नभ्याइने’ सूचीमा परेको छ। सर्वोच्च अदालतका न्यायाधीशद्वय सुष्मालता माथेमा र विनोद शर्माको इजलासमा परेको उक्त मुद्दा मंगलबार हेर्न नभ्याइने भएको हो ।
२७ कात्तिकमा सरकारले सामाजिक सद्भाव र सामाजिक वातावरणमा नकारात्मक असर पारेको भन्दै टिकटकमाथि रोक लगाउने निर्णय गरेको थियो । उक्त निर्णयविरुद्ध सर्वोच्च अदालतमा १४ ओटा रिट दर्ता भएका थिए ।
ती रिटहरुमाथि मंसिर ५ गते भएको प्रारम्भिक सुनुवाइमा सर्वाेच्चले मङ्सिर १५ गतेभित्र टिकटक बन्द गर्नुको कारणसहितको लिखित जवाफ पेस गर्न सरकारकाे नाममा आदेश जारी गर्नुका साथै आज (मंगलवार) का लागि पूर्ण सुनुवाइको पेसी तोकेको थियो ।