नेपाली बजारमा सार्वजनिक भएकै दिन सोल्डआउट भयो एक करोड ६८ लाख पर्ने एमजी साइबरस्टर

काठमाडौं । एमजी मोटर्सको साइबरस्टर ईभी सार्वजनिक भएकै दिन सोल्डआउट भएको छ । ‘नाडा अटो शो २०२४’ को अवसर पारी मंगलवार सार्वजनिक भएको यो गाडी त्यही दिन सोल्डआउट भएको हो ।

नेपाली बजारमा पारामाउन्ट मोटर्सले एमजी साइबरस्टरका दुई ओटा युनिट ल्याएको थियो । त्यसमध्ये एउटा युनिट भन्सार नाकामा आउनासाथ बुक भएको र अर्को नाडा अटो शोमा बुक भएको कम्पनीका प्रतिनिधिले जानकारी दिएका छन् । 

कम्पनीले नेपाली बजारमा यो ईभीको मूल्य एक करोड ६८ लाख रुपैयाँ तोकेको छ ।

स्पोर्टी डिजाइन भएको गाडीले अवलोकनकर्ताको ध्यान खिचेको थियो । गाडी सोल्डआउट भएपछि नाडा अटो शो २०२४ मा एमजीको स्टलबाट यो गाडी हटाइएको छ । 

कस्तो छ साइबरस्टर ?

बेलायती ब्रान्ड एमजीको आइकनिक विरासतलाई आधुनिक विद्युतीय आविष्कारसँग जोडेर यो गाडी डिजाइन गरिएको छ । यसलाई एउटा कार मात्र नभएर एक स्टेटमेन्टकै रूपमा कम्पनीले प्रस्तुत गरिरहेको छ ।

३७५ किलोवाट क्षमताको मोटर रहेको यो गाडीले ७२५ अधिकतम ५४४ पीएस तथा ७२५ एनएम टर्क दिन सक्छ । ३.२० सेकेन्डमै शून्यबाट १०० किलोमिटरको गति लिन सक्ने साइबरस्टरले ५०३ किमिभन्दा बढी रेन्ज दिने दाबी गरिएको छ । जुन १५० किलोवाट डीसी चार्जरबाट ३८ मिनेटमै ८० प्रतिशत चार्ज हुने बताइएको छ ।

गाडीमा १९ इन्चको अलोय ह्विल, सिजर ओपनिङ डोर, फुल्ली इलेक्ट्रिक हुड, लन्च कन्ट्रोल, ७ इन्चको टच स्क्रिन, र्‍यापअराउन्ड ३ स्क्रिन ककपिट, एन्ड्रोइड अटो तथा एप्पल कार प्ले, आठ ओटा स्पिकर सहितको बोस अडिओ सिस्टम, रियर ह्विल ड्राइभ, १९५ किमि प्रति घण्टासम्मको उच्च गति जस्ता सुविधा यो गाडीमा पाउन सकिन्छ ।

एमजी साइबरस्टर ईभीमा सफ्ट-टप कन्भर्टिभल (हुड नै पछाडि सार्न मिल्ने) रहेको छ, जुन १० सेकेन्डमै खोल्न र बन्द गर्न सकिने बताइएको छ । यसले ५० किलोमिट प्रति घण्टाको गतिमा समेत काम गर्छ । यसबाट सुरक्षित र आरामदायी पन कायमै राखेर खुला हावामा ड्राइभिङको आनन्द लिन सकिन्छ ।

गाडीको लम्बाई ४,५३५ एमएम, चौडाई १,९१३ एमएम, उचाई १,३२९ एमएम र ह्विलबेस २,६९० एमएम रहेको छ । २० एमएमको एलोय ह्विल रहेको यो गाडीमा पर्मानेन्ट म्याग्नेट सिंक्रोनस मोटर राखिएको छ । यसमा ७७ किलोवाट आवर क्षमताको लिथियम आयन ब्याट्री पाउन सकिन्छ ।

पछिल्लो अध्यावधिक: भदौ १३, २०८१ १३:४८

टिप्पणीहरू