दुबई-नेपाल ल्यापटप तस्करी, न्युरोडका व्यापारीसहित ७ जना पक्राउ

काठमाडौं  । दुबईबाट फर्किने यात्रुलाई व्यक्तिगत सामानको रूपमा ल्यापटप ओसार्न लगाई भन्सार छली गर्ने समूह पक्राउ परेको छ । उपत्यका अपराध अनुसन्धान कार्यालयले न्युरोडस्थित एलिटेड सप्लायर्सका सञ्चालकसहित ७ जनालाई नियन्त्रणमा लिएको हो ।

प्रहरीका अनुसार, न्युरोडको संकटा मन्दिर नजिक रहेको एलिटेड सप्लायर्स प्रालिबाट भन्सार छल्ने उद्देश्यले दुबईबाट ल्यापटप मगाइने गरिएको थियो । यस क्रममा डेल कम्पनीका ७२ थान ल्यापटप र पाँच थान आईफोन प्रहरीले बरामद गरेको छ ।

यस घटनामा एलिटेड सप्लायर्सका सञ्चालक रसिद आलमसहित चित्रबहादुर मल्ल ठकुरी, हुकुमबहादुर मल्ल र सुमित केसी, राकेश गिरी, तारा बहादुर रेस्मी मगर र कमला फियाक पक्राउ गरेका छन् ।

अनुसन्धानका क्रममा व्यापारीहरूले दुबईबाट फर्किने यात्रुलाई प्रतिव्यक्ति एउटा ल्यापटप र एउटा मोबाइल ल्याउन लगाएर भन्सार छलेको पाइएको छ । हालको कानुनी व्यवस्थाअनुसार व्यक्तिगत प्रयोगको लागि यति मात्रामा ल्याइएका इलेक्ट्रोनिक सामानमा भन्सार छुट हुने भएकाले तस्करीको यो तरिका अपनाइएको प्रहरीले जनाएको छ ।

गत २०८१ चैत १८ गते दुबईबाट नेपाल अवतरण भएका तीन जना यात्रुहरूबाट ल्यापटप र मोबाइल बरामद गरिएको थियो । गौशाला बत्तीसपुतलीबाट सामानसहित पक्राउ परेका उनीहरूले सामान लिन आएका अन्य तीन जनालाई समेत नियन्त्रणमा लिएका थिए ।

अनुसन्धानका क्रममा न्युरोडको संकटा मन्दिर नजिक एलिटेड सप्लायर्स प्रालिबाट रसिद आलमले यसअघि पनि पटक-पटक सामान ल्याएको खुलेको छ । उनको पसलबाट बिलबिजक नभएका डेल कम्पनीका ६९ थान ल्यापटप र २ थान मोबाइल फेला परेका थिए ।

पक्राउ परेका व्यक्तिहरूलाई आवश्यक अनुसन्धान तथा कारबाहीका लागि त्रिभुवन विमानस्थल भन्सार कार्यालय गौचर पठाइएको प्रहरीले जनाएको छ ।

पक्राउ परेका व्यक्तिहरू

१. रसिद आलम (३०, मोरङ) – एलिटेड सप्लायर्सका सञ्चालक
२. चित्रबहादुर मल्ल ठकुरी (२६, मकवानपुर)
३. हुकुमबहादुर मल्ल (२४, मकवानपुर)
४. सुमीत केसी (३१, उदयपुर)
५. राकेश गिरी (२८, महोत्तरी) – दुबईबाट ल्यापटप ल्याउने
६. तारा बहादुर रेस्मी मगर (४१, पाल्पा) – दुबईबाट ल्यापटप ल्याउने
७. कमला फियाक (३५, पाँचथर) – दुबईबाट ल्यापटप ल्याउने

पछिल्लो अध्यावधिक: चैत २०, २०८१ ९:४६

टिप्पणीहरू