मे ८ देखि टिकटक नोट्स बन्द हुने, ‘लेमन८’ लाई प्राथमिकता

काठमाडौं । इन्स्टाग्राम प्रतिस्पर्धीको रूपमा टिकटकले ल्याएको टिकटक नोट्स एप आउँदो मे ८ देखि बन्द हुने भएको छ । गत वर्ष क्यानडा, अस्ट्रेलिया र भियतनाममा परीक्षणका रूपमा सुरु गरिएको यो फोटो-शेयरिङ एप अब बन्द हुने भएको हो ।

कम्पनीले टिकटक नोट्स प्रयोगकर्तालाई एप बन्द गर्ने निर्णयको जानकारी दिँदै बाइटडान्सको स्वामित्वमा रहेको लेमन८ (Lemon8) प्रयोग गर्न आग्रह गरेको छ । टेकक्रन्चका अनुसार यी दुई एपमा समान कार्यक्षमता भएकाले कम्पनीले यो निर्णय गरेको हो ।

“हामी टिकटक नोट्सबाट प्राप्त प्रतिक्रियालाई लेमन८ मा ल्याउन उत्साहित छौं । किनकि हामी हाम्रो कम्युनिटीलाई फोटो सामग्री शेयर गर्न र अनुभव गर्न डेडिकेटेड स्पेस बनाइरहेका छौं, जुन टिकटक अनुभवलाई पूरक र विस्तार गर्न डिजाइन गरिएको छ,” टिकटकका प्रवक्ताले टेकक्रञ्चलाई दिएको विज्ञप्तिमा भनेका छन् ।

टिकटक नोट्स बन्द हुनुको विशेष कारणमा यसका प्रयोगकर्ता संख्या कम देखनु पनि हो । डिसेम्बर २०२४ सम्म लेमन८ का विश्वव्यापी रूपमा मासिक सक्रिय प्रयोगकर्ताको संख्या एक करोड २४ लाख थियो ।

टिकटक नोट्स प्रयोगकर्तालाई पठाइएको सूचनामा टिकटकले एप बन्द गर्ने निर्णय हल्का रूपमा नलिएको उल्लेख गरेको छ । जसमा टिकटक नोट्समा रहेका डेटा डाउनलोड र सुरक्षित गर्न तथा ‘लेमन८’ मा आफ्नो सिर्जनशीलता शेयर गर्न प्रोत्साहन गरिएको छ । टिकटकका अनुसार लेमन८ एक लाइफस्टाइल एप हो । यसमा टिकटक नोट्सको तुलनामा धेरै सुविधा दिइएको छ ।

इन्स्टाग्राम र पिन्ट्रेस्ट जस्तै यसमा प्रयोगकर्ताले स्लाइड शो र फोटो आर्काइभ शेयर गर्न सक्नेछन् । साथै  ‘फलोइङ’ र ‘फर यु’ फिडहरूमार्फत कन्टेनेट ब्राउज गर्न सकिन्छ । लेमन८ ले प्रयोगकर्तालाई क्रियटभ टुल, फिल्टर, इफेक्ट, स्टिकर, टेक्स्ट टेम्प्लेटहरू लगायतमा पहुँच प्रदान गर्दछ ।

पछिल्लो अध्यावधिक: चैत २०, २०८१ १०:२१

टिप्पणीहरू