एलन मस्कले ल्याए ह्वाट्सएप जस्तै छुट्टै मेसेजिङ एप ‘एक्सच्याट’, केके छन् फिचर ?

काठमाडौँ । सामाजिक सञ्जाल प्लेटफर्म एक्सले मेसेज आदानप्रदानका लागि आफ्नो छुट्टै एप एक्सच्याट (XChat) सार्वजनिक गरेको छ । शुक्रबारदेखि सर्वसाधारणका लागि उपलब्ध यो एप हाललाई आईओएस प्रयोगकर्ताका लागि मात्र उपलब्ध गराइएको छ ।

नयाँ एपमार्फत प्रयोगकर्ताहरूले आफ्ना एक्स कन्ट्याक्टहरूसँग कुराकानी गर्न, फाइलहरू शेयर गर्न, अडियो र भिडिओ कल गर्न तथा ग्रुप च्याट गर्न सक्नेछन् । कम्पनीले यस वर्षको सुरुमा प्रयोगकर्ताहरूको प्रतिक्रिया लिनका लागि एउटा सानो समूहमा यसको बेटा परीक्षण गरेको थियो ।

एक्सच्याट एपको सुरुवात कम्पनीको रणनीतिक योजनाको एउटा महत्त्वपूर्ण हिस्सा मानिएको छ । एक्सले आफ्नो सामाजिक सञ्जाललाई मेसेज वा भुक्तानी (पेमेन्ट्स) जस्ता अन्य सेवाहरूका लागि प्रस्थान विन्दुको रूपमा हेरेको छ । भुक्तानी सेवाका लागि पनि छुट्टै एप परीक्षण भइरहेको छ । यद्यपि हालसम्म सार्वजनिक गरिएको भने छैन ।

प्लेटफर्मको एउटा अंशलाई छुट्टै एपको रूपमा ल्याउने यो निर्णय कम्पनीका मालिक एलन मस्कको अघिल्लो योजनाभन्दा ठुलो परिवर्तन हो । मस्कले पहिले एक्सलाई नै एउटा 'एभ्रिथिङ एप' बनाउने लक्ष्य राखेका थिए । जहाँ मेसेज, भुक्तानी, क्रियटरका सामग्री, शपिङ र एआई जस्ता सबै सुविधाहरू एउटै ठाउँमा उपलब्ध हुने भनिएको थियो ।

तर अहिले मस्कको एआई कम्पनी एक्सएआई (जोसँग एक्सको स्वामित्व छ र त्यो स्वयम् मस्कको अर्को कम्पनी स्पेसएक्सको स्वामित्वमा छ) ले प्रयोगकर्ताहरूका लागि विभिन्न एपहरूको सेट उपलब्ध गराउन थालेको हो ।सुरुवातको समयमा एक्सच्याटले मेसेज र कलिङका साथै गोपनीयता सुरक्षित गर्ने दाबी गरिएका अन्य सुविधाहरू पनि प्रदान गरेको छ ।

यसको च्याटमा सबैका लागि मेसेज सम्पादन (एडिट) गर्ने र मेटाउने (डिलेट गर्ने) क्षमता, डिसअपेरिङ मेसेज (आफैँ हराउने मेसेज) र स्क्रिनशट ब्लक गर्ने सुविधा समावेश छन् । एपमा कुनै विज्ञापन वा प्रयोगकर्ता ट्र्याकिङ गर्ने संयन्त्र नरहेको एक्सको दाबी छ ।

कम्पनीले सबै मेसेजहरू 'इन्ड-टु-एन्ड इन्क्रिप्टेड' र पिनद्वारा सुरक्षित रहेको दाबी गरेको छ । यद्यपि सुरक्षा विज्ञहरूले यसअघि नै कम्पनीको इन्क्रिप्सन सम्बन्धी दाबीहरूमाथि विवाद गरेका थिए । विज्ञहरूले एक्सच्याट सेवा सिग्नल जस्ता अन्य इन्क्रिप्टेड एपहरूभन्दा कम सुरक्षित रहेको चेतावनी दिएका थिए । अहिले एप व्यापक रूपमा उपलब्ध भएसँगै विज्ञहरूले यसमा आवश्यक सुधारहरू भए नभएको पुन: मूल्याङ्कन गर्नेछन् ।

एक्सच्याट व्यक्तिगत र सामूहिक च्याटका लागि मात्र नभएर एक्सको कम्युनिटिज फिचरको नयाँ गन्तव्य पनि हुनेछ । कम्पनीले मुख्य प्लेटफर्ममा प्रयोगको कमी र अत्यधिक स्पामका कारण कम्युनिटिज बन्द गर्ने निर्णय गरेपछि यसलाई एक्सच्याटमा सारेको हो । यसले एपको सुरुवाति प्रयोगकर्ता सङ्ख्या बढाउन मद्दत पुग्ने अपेक्षा गरिएको छ ।

एक्सका प्रमुख डिजाइनर बेन्जी टेलरका अनुसार यो सुरुवात मात्र हो र मेसेजिङ सेवाका लागि कम्पनीले अझै धेरै नयाँ सुविधाहरू थप्ने योजना बनाएको छ । कम्पनीले एन्ड्रोइड प्रयोगकर्ताका लागि भने यो एप कहिलेसम्म उपलब्ध हुन्छ भन्ने स्पष्ट जानकारी दिएको छैन । 

 

पछिल्लो अध्यावधिक: बैशाख १३, २०८३ ११:४४

टिप्पणीहरू