गुगल म्याप्सले किन खपत गर्छ यति धेरै ब्याट्री ? यस्तो छ ४ घण्टासम्म ब्याट्री जोगाउने नयाँ पावर सेभिङ मोड

काठमाडौँ । अहिलेको युगमा स्मार्टफोन हाम्रा लागि केवल सञ्चारको माध्यम मात्र रहेन, यो हाम्रो यात्राको एउटा अभिन्न अङ्ग समेत बनिसकेको छ । अपरिचित ठाउँको यात्रा होस् वा सहरभित्रकै छोटो दूरी, हामी प्रायः गुगल म्याप्समा निर्भर हुन्छौँ ।

तर म्याप्स प्रयोग गर्दाको एउटा तितो यथार्थ के हो भने यसले फोनको ब्याट्रीलाई अत्यन्तै द्रुत गतिमा खपत गरिदिन्छ । लामो यात्रामा निस्कँदा वा चार्ज गर्ने सुविधा नभएको अवस्थामा म्याप चलाउनु भनेको फोनलाई मृत्युको मुखमा धकेल्नु जस्तै हो ।

यही गम्भीर समस्यालाई समाधान गर्न गुगलले आफ्नो नेभिगेसन सेवामा एउटा नयाँ पावर सेभिङ मोड प्रस्तुत गरेको छ । दाबी गरिए अनुसार यो फिचरले स्मार्टफोनको ब्याट्रीको आयुलाई चार घण्टासम्म बढाउन सक्छ ।

तर यो फिचर जति आकर्षक देखिन्छ, यसका साथमा आउने केही सर्त वा सीमाहरू उत्तिकै चुनौतीपूर्ण छन् । आज हामी तपाईँलाई गुगल म्याप्सको यो नयाँ फिचर, यसको काम गर्ने तरिका र यसले प्रयोगकर्तामा पार्ने प्रभावका बारेमा विस्तृत चर्चा गर्दैछौँ ।

किन यति धेरै ब्याट्री खान्छ गुगल म्याप्सले ?

गुगल म्याप्सले ब्याट्री खपत गर्नुका पछाडि धेरै प्राविधिक कारणहरू छन् । सबैभन्दा पहिलो र मुख्य कारण हो-निरन्तरको जीपीएस ट्रयाकिङ । प्रत्येक सेकेन्ड तपाईँको भौगोलिक अवस्थिति पत्ता लगाउनका लागि फोनले निरन्तर स्याटलाइटसँग सम्पर्क गरिरहनुपर्छ । जसले फोनको प्रोसेसरलाई कहिल्यै आराम गर्न दिँदैन ।

दोस्रो कारण हो, रियल-टाइम डेटा स्ट्रिमिङ । म्याप्सले केवल बाटो मात्र देखाउँदैन, यसले लाखौँ अन्य चालकहरूबाट प्राप्त तथ्याङ्कका आधारमा सडकको वास्तविक गति, दुर्घटनाको जानकारी र ट्राफिक चापको विवरण पनि डाउनलोड गरिरहेको हुन्छ । मसिन लर्निङको प्रयोग गरेर यसले निरन्तर तपाईँको गन्तव्यमा पुग्ने समय (ईटीए) र वैकल्पिक बाटाहरूको गणना गरिरहन्छ ।

तेस्रो र सबैभन्दा देखिने कारण भनेको ब्राइट स्क्रिन हो । दिउँसोको उज्यालोमा बाटो स्पष्ट देख्नका लागि फोनको स्क्रिनलाई फुल ब्राइटनेसमा चलाउनुपर्ने हुन्छ । पूर्णतः रङ्गीन नक्सा, थ्रिडी भवनहरू र निरन्तर परिवर्तन भइरहने दृश्यहरूले गर्दा फोनको प्रोसेसर र डिस्प्ले दुवैमा ठुलो चाप पर्छ । यी सबै कारणहरू मिलेर एउटा ठुलो ब्याट्री भएको फोनलाई पनि यात्रा नसकिँदै डेड बनाइदिन सक्छन् ।

नयाँ पावर सेभिङ मोड

गुगलले हालै ल्याएको यो नयाँ मोड विशेष गरी ती प्रयोगकर्ताहरूका लागि लक्षित छ, जो लामो दूरीको यात्रामा छन् र उनीहरूसँग फोन चार्ज गर्ने विकल्प छैन । यो फिचरले नेभिगेसनका लागि आवश्यक पर्ने आधारभूत जानकारीहरू नहटाइकन अनावश्यक र धेरै ऊर्जा खपत गर्ने भिजुअलहरूलाई न्यून बनाउँछ ।

प्राविधिक भाषामा भन्नुपर्दा यो मोडले फोनको अलवेज अन डिस्प्ले प्रविधिको प्रयोग गर्छ । जब तपाईँ यो मोड अन गर्नुहुन्छ र नेभिगेसन सक्रिय भएको बेला फोनको पावर बटन थिच्नुहुन्छ, फोनको स्क्रिन पूर्ण रूपमा बन्द हुनुको सट्टा एउटा मोनोक्रोम अर्थात् कालो र सेतो इन्टरफेसमा परिणत हुन्छ । यसले गर्दा विशेष गरी ओएलईडी डिस्प्ले भएका फोनहरूमा ब्याट्रीको ठुलो बचत हुन्छ । किनकि कालो रङ्ग देखाउनका लागि फोनका पिक्सेलहरू बल्नु पर्दैन ।

पिक्सेल १० सिरिजमा सीमित

अहिलेको लागि एउटा खड्किने विषय के छ भने यो फिचर सबै एन्ड्रोइड प्रयोगकर्ताका लागि उपलब्ध छैन । गुगलले यो सुविधा हालका लागि आफ्ना नयाँ मोडेलहरू पिक्सेल १०, पिक्सेल १० प्रो, प्रिक्सेल १० प्रो एक्सएल र पिक्सेल १० प्रो फोल्डमा मात्र सीमित राखेको छ । यी फोनहरूमा गुगलको नयाँ टेन्सर जी-५ चिपसेट प्रयोग गरिएको छ । जसले यस्ता जटिल कार्यहरूलाई ऊर्जा कम खपत गर्नेगरी व्यवस्थापन गर्न सक्छ ।

गत वर्षदेखि यो फिचर रोलआउट हुन थालेको भए पनि अझैसम्म अन्य पुराना पिक्सेल मोडेल वा सामसङ र साओमी जस्ता अन्य ब्रान्डका फोनहरूमा पुगेको छैन । यद्यपि गुगलले बिस्तारै यसलाई व्यापक बनाउने अपेक्षा गरिएको छ ।

यो मोड कसरी सक्रिय गर्ने ?

यदि तपाईंसँग पिक्सेल १० सिरिजको फोन छ भने तपाईँले यो फिचरलाई गुगल म्याप्सको भित्री सेटिङबाट मिलाउनुपर्ने हुन्छ । यसका लागि सबैभन्दा पहिला गुगल म्याप्स एप खोल्नुहोस् ।

दायाँ कुनाको माथिल्लो भागमा रहेको आफ्नो प्रोफाइल तस्बिरमा ट्याप गर्नुहोस् । अब सेटिङ्स विकल्प छान्नुहोस् र नेभिगेसन सेटिङमा जानुहोस् ।

त्यहाँ रहेको ड्राइभिङ अप्सन भित्र पावर सेभिङ मोडको टगल बटन देख्नुहुनेछ, त्यसलाई अन गर्नुहोस् ।

एक पटक यो सेटिङ अन गरिसकेपछि तपाईँले यात्रा सुरु गर्दा केवल पावर बटन थिचे पुग्छ । यति गरेपछि तपाईँको फोनको लक स्क्रिनमा नै नेभिगेसनका मुख्य जानकारीहरू देखिन थाल्नेछन् ।

पावर सेभिङ मोड अन गर्दा हुने असर

ब्याट्री जोगिन्छ भन्दैमा यो मोड सबैका लागि सधैँ उपयोगी नहुन सक्छ । गुगलले ब्याट्री जोगाउनका लागि म्याप्सका धेरै महत्त्वपूर्ण फिचरहरूलाई यो मोडमा हटाएको छ । सामान्यतया म्याप्समा सडकमा जाम छ भने रातो, मध्यम ट्राफिक भए पहेँलो र सफा भए हरियो रङ्ग देखिन्छ ।

तर पावर सेभिङ मोडमा यो कलर कोडेड जानकारी उपलब्ध हुँदैन । तपाईँले सडकमा भइरहेको दुर्घटना, निर्माण कार्य वा अचानक हुने जामको भिजुअल अलर्टहरू पाउनुहुने छैन ।

त्यस्तै यो मोडमा थ्रिडी भवनहरू, सडकका विस्तृत नामहरू र नक्साका जटिल तहहरू हटाइन्छ । स्क्रिनमा केवल एउटा सरल कालो र सेतो रेखा र तपाईँको अर्को टर्न कहाँ छ भन्ने सङ्केत मात्र देखिन्छ ।

यात्राको बीचमा पेट्रोल पम्प कहाँ छ ? नजिकैको रेस्टुरेन्ट वा कफी शप कहाँ होला ? यस्ता विवरणहरू यो मोडमा देखिँदैनन् । यदि तपाईँलाई बाटोमा केही खान मन लाग्यो वा तेल भर्नुपर्ने भयो भने तपाईँले यो फिचर बन्द गरेर पुनः सामान्य नक्सामा फर्कनुपर्ने हुन्छ ।

धेरै चालकहरूले आफ्नो फोनलाई गाडीको ड्याशबोर्डमा तेर्सो पारेर राख्न रुचाउँछन् । तर यो पावर सेभिङ मोड केवल ठाडो मोडमा मात्र चल्छ । यसले गर्दा ल्यान्डस्केप माउन्ट प्रयोग गर्नेहरूका लागि यो असुविधाजनक हुन सक्छ ।

अचम्मको कुरा त के छ भने यो फिचर केवल गाडी चलाउँदा मात्र काम गर्छ । यदि तपाईँ पैदल यात्रा गर्दै हुनुहुन्छ, साइकल चलाउँदै हुनुहुन्छ वा सार्वजनिक यातायातमा हुनुहुन्छ भने यो मोडले काम गर्दैन । जबकि पैदल यात्रीहरूलाई ब्याट्रीको झन् बढी आवश्यकता हुन सक्छ ।

कस्तो अवस्थामा काम लाग्छ ?

यो मोडलाई गुगलले डिफल्ट सेटिङको रूपमा भन्दा पनि एउटा आपत्कालीन टुलको रूपमा डिजाइन गरेको देखिन्छ । कल्पना गर्नुहोस् त, तपाईँ एउटा लामो रोड ट्रिपमा हुनुहुन्छ र तपाईँको गाडीको मोबाइल चार्जर अचानक बिग्रियो ।

तपाईँको फोनमा केवल १० प्रतिशत चार्ज बाँकी छ र गन्तव्य अझै टाढा छ । यस्तो बेला यो मोडले तपाईँको फोनलाई थप ४ घण्टासम्म जीवित राख्न सक्छ । यसले तपाईँलाई बाटो नबिराई गन्तव्यमा पुग्न मद्‍दत त गर्छ । तर बाटोका अन्य सुविधाहरू भने दिँदैन ।

त्यसैले दैनिक छोटो यात्रामा वा फोन चार्ज गर्ने सुविधा भएको बेला यो मोड चलाउनुको खासै अर्थ देखिँदैन । यसले तपाईँलाई सडकको वास्तविक अवस्थाबाट टाढा राख्छ, जुन सुरक्षाको दृष्टिकोणले कहिलेकाहीँ जोखिमपूर्ण पनि हुन सक्छ ।

पछिल्लो अध्यावधिक: बैशाख २८, २०८३ ८:५

टिप्पणीहरू