मध्यविन्दु नगरपालिकामा अनलाइनबाटै राजस्व भुक्तानी, यस्तो छ तरिका
साउन १९, २०७८ ८:४
काठमाडाैं । नवलपुरस्थित मध्यविन्दु नगरपालिकाले अनलाइनमार्फत राजस्व भुक्तानी सुरु गरेको छ । मध्यविन्दु-१५ का देशबहादुर गुरुङको सम्पत्ति कर भुक्तानी गर्दै नगरपालिकाले अनलाइन राजस्व भुक्तानी सुरु गरेको हो ।
मध्यविन्दु नगरपालिका प्रमुख चन्द्रबहादुर रानाले अब नगरवासीले सम्पत्ति तथा भूमि, व्यवसाय र घरबाहल कर भुक्तानीका लागि नगरपालिका वा सम्बन्धित वडा कार्यालय पुग्नु नपर्ने बताए ।
विद्युतीय भुक्तानी सुरु भएपछि नगरपालिकाका स्थानीय करदाताहरूले घरमा नै बसेर अनलाइनमार्फत राजस्व भुक्तानी गर्न सक्ने नगरप्रमुख रानाले बताए । अनलाइन भुक्तानी सुरु भएपछि राजश्व भुक्तानीमा सेवाग्राहीको सहभागिता र राजश्वको दायरा वृद्धि हुने विश्वास लिइएको रानाको भनाइ छ ।
विद्युतीय भुक्तानीबारे करदातालाई शिक्षा दिन समेत नगरपालिकाले आवश्यक कार्य गर्ने नगर उपप्रमुख ओमकुमारी महतोले बताए ।
आइतबारदेखि अनलाइन प्रणाली सुरु भएपछि सबै करदाताले विद्युतीय प्रणालीमार्फत झण्झट विनै राजस्व भुक्तानी गर्न सक्ने महतोको भनाइ छ । विद्युतीय भुक्तानीको माध्यम ईसेवाबाट नगरपालिकाको कर भुक्तानी गर्न सकिने नगर उपप्रमुख महतोले बताए ।
नगरपालिकाले विद्युतीय भुक्तानीका लागि ईसेवासँग सम्झौता गरेर काम अगाडि बढाएको नगरपालिका आईटी शाखा प्रमुख नरेश गुरुङले बताए । अन्य अनलाइन भुक्तानी गर्ने सेवाप्रदायकसँग पनि सम्झौता गरेर भुक्तानी व्यवस्थालाई सहज बनाउँदै लैजाने तयारीमा नगरपालिका जुटेको गुरुङको भनाइ छ ।
करदाताले कर तिर्न ई-पोर्टलमा विवरण भरेर दर्ता गराएपछि ईसेवा डिजिटल भुक्तानी प्रणाली प्रयोग गरेर मोबाइलबाटै कर भुक्तानी गर्न सकिने गुरुङले बताए । यो प्रणालीबाट राजस्व अनलाइनबाटै भुक्तानी गर्न र आफूले तिरेको शुल्कको रसिद अनलाइनबाटै प्राप्त गर्न सकिनेछ ।
अनलाइन प्रणाली शुरु गर्न करदाताले वडा कार्यालमा गएर विवरणहरू अद्यावधिक गराएपछि घरबाटै राजस्व भुक्तानी गर्न सकिने गुरुङको भनाइ छ ।
अनलाईन प्रणालीमार्फत कर कसरी तिर्ने ?
१. सर्वप्रथम पुरानो कर तिरेको रसिद हेर्ने : त्यस मार्फत तपाइले करदाता संकेत नम्बर (रसिदको माथिल्लो भागको बायाँ पट्टि ) तथा आन्तरिक संकेत नम्बर (रसिदको माथिल्लो भागको दायाँ पट्टि) पत्ता लगाउन सक्नु हुन्छ
२. अनलाइन पोर्टलमा जानुहोस
३. “नयाँ आन्तरिक संकेत न. थाहा पाउन यहाँ क्लिक गर्नुहोस्” मा थिच्नुहोस्
४. स्टेप १ मा पत्ता लगाए अनुसार करदाता संकेत न. तथा आन्तरिक संकेत न. राख्नुहोस : त्यसपछि सिस्टमले तपाईंलाई नयाँ आन्तरिक संकेत नम्बर दिने छ ।
५. त्यसपछि “नयाँ प्रयोगकर्ता ? यहाँ दर्ता गर्नुहोस्” मा थिच्नुहोस्
६. दर्ता गर्नुहोस
७. Login गर्नको लागि Username को ठाउँमा नया आन्तरिक संकेत राख्नुहोस तथा पासवर्ड राख्नुहोस
८. Login गरिसकेपछि ” करदाता ” ( माथिदेखि बायाँ पट्टि) थिच्नुहोस ।
९. “भुक्तानी” मा थिच्नुहोस
१०. त्यसपछि “मुल्यांकन” मा “+” थिच्नुहोस
११. सम्पति कर / व्यवसाय कर choose गरेर मूल्यांकन गर्नुहोस
१२. कर तिर्नको लागि सेवा-प्रदायक(Esewa) छनौट गरी तिर्नुहोस
१३. सेवा प्रदायकको (Esewa) एप मार्फत तिर्नको लागि करदाता न. मा नयाँ संकेत नम्बर राख्नुहोला
नोट : करदाता पोर्टलमा प्रयोगकर्ता बनाउने तथा भुक्तानी प्रक्रिया लगायतको कार्य सम्पन्न गर्नको लागि समेत ईमेल र एसएमएस मार्फत प्रकृया प्रमाणीकरण गर्नुपर्ने हुँदा ईमेल र मोबाइल नं. राख्नु अनिवार्य छ ।
उक्त विवरण अद्यावधिक गर्नको लागि मध्यविन्दु नगरपालिका या मातहतका वडा कार्यालयहरुमा सम्पर्क राखी आफ्नो विवरण अद्यावधिक गराउन सकिनेछ ।
रासस
पछिल्लो अध्यावधिक: असोज २, २०७९ २२:३१
