काठमाडौं । भारतले गरिना फ्रि फायरमाथि लागेको प्रतिबन्ध फुकुवा गर्ने सङ्केत दिएको छ । त्यसो त भारतले फ्रि फायरमाथि प्रतिबन्ध लगाएको कुरा आधिकारिक घोषणा भने गरेको छैन ।
यद्यपि भारतमा फ्रि फायर गेमलाई अचानक प्ले स्टोरबाट हटाइएको थियो । तर यो गेमको म्याक्स भर्सन फ्रि फायर म्याक्स भने प्ले स्टोरबाट डाउनलोड गरेर खेल्न रोकिएको थिएन ।
अचानक प्ले स्टोरबाट फ्रि फायर गेम गायब भए यता भारतमा कुनै पनि आधिकारिक प्रतियोगिता आयोजना गरिएको थिएन । अब भने प्रतियोगिताहरू पुन: सञ्चालन हुने सङ्केत मिलेको छ ।
भारतको उत्तर प्रदेश राज्यका एक राजनीतिज्ञ गिरिशचन्द्र यादवले ट्वीट गर्दै फ्रि फायरको मातृ कम्पनी गरिनासँग ई-स्पोर्ट्सको विकासका लागि सम्झौता भएको जानकारी दिएका हुन् ।
कल दिनांक- 28-07-2023 को उत्तर प्रदेश सरकार की तरफ से अग्रणी वैश्विक खेल कंपनी गरेना के साथ ई-स्पोर्ट्स में उ. प्र. को अग्रिम पंक्ति में स्थापित करने के लिए एक एम. ओ. यू. पर हस्ताक्षर करने के उपरांत यशस्वी मुख्यमंत्री जी से शिष्टाचार मुलाकात किया गया। pic.twitter.com/6pgSdtdgVH
— Girish Chandra Yadav (@girishyadavbjp) July 29, 2023
उनको ट्वीटमा उत्तर प्रदेशका मुख्यमन्त्री योगी आदित्यनाथ सहित गरिनाका कर्मचारी र अन्य केही व्यक्तिसँगको फोटो समेत देख्न सकिन्छ ।
एक भारतीय युट्युबरले समेत यस विषयमा गरिनासँग सम्पर्क गरी प्रदेशसँग सम्झौता भएको प्रमाणित गर्ने स्क्रिनशट सार्वजनिक गरेका छन् । यसै विषयमा उत्तर प्रदेशको खेलकुद तथा युवा कल्याणका अतिरिक्त मुख्य सचिव नवनीत सहगलको भिडियो पनि सार्वजनिक भएको छ ।
जसमा गरिनासँग भएको सम्झौताको बारेमा उनले बताइरहेका छन् । यो सम्झौताले केही हदसम्म भारत सँगसँगै नेपालमा पनि फ्रि फायर ई-स्पोर्ट्स पुन: लयमा फर्किने सम्भावना देखाएको छ ।
भारतमा फ्रि फायर ई-स्पोर्ट्स बन्द भए यता नेपालमा पनि फ्रि फायर गेमको क्रेज निकै नै कम भएको छ ।