कस्तो होला तीन पटकसम्म पट्याउन मिल्ने ह्वावेको स्मार्टफोन ?
भदौ १, २०८१ १८:४५
काठमाडौं । चिनियाँ प्रविधि कम्पनी ह्वावेले तीन पटकसम्म पट्याउन मिल्ने स्मार्टफोन विकास गरिरहेको पुष्टि भएको छ । ह्वावे कन्ज्युमर बिजनेस ग्रुपका प्रमुख कार्यकारी अधिकृत (सीईओ) रिचर्ड यूले ट्रिपल फोल्डिङ फोन बोकेको फोटो सार्वजनिक भएपछि यो रहस्य खुलासा भएको हो ।
उनैले कतै यात्रामा जाँदा चलाइरहेको उक्त फोनको फोटो गएको बिहीवार दोस्रो पटक बाहिरिएको हो । यसअघि अगस्टको सुरुआततिर पनि ट्रिपल फोल्डिङ फोनसँगैको यूको फोटो बाहिरिएको थियो ।
एन्ड्रोइड अथोरिटीका अनुसार दुवै पटक ट्रिपल फोल्डेबल फोनको फोटो चिनियाँ सामाजिक सञ्जाल विबोमा बाहिरिएको हो । यस पटक बाहिरिएको फोटोमा यूले पूर्ण तरिकाले तेस्रो पटकसम्म फोल्ड गरिएको फोन हातमा लिएर चलाइरहेको देख्न सकिन्छ ।
रिचर्ड यूको हातमा देखिएको यो स्मार्टफोनले इन्टरनेटमा चर्चा पाइरहेको छ । एन्ड्रोइड अथोरिटीका अनुसार यो फोटो चिनियाँ सामाजिक सञ्जाल विबोमा पोस्ट गरिएको थियो ।
फोटोमा यूले पूर्ण रूपमा तेस्रो पटकसम्म फोल्ड गरिएको फोन प्रयोग गरिरहेको देख्न सकिन्छ, जुन अत्यन्त पातलो देखिन्छ । यसबाट यो फोन सामसङको ग्यालेक्सी जेड फोल्ड सिक्सभन्दा पनि पातलो हुनसक्ने अनुमान गरिएको छ ।
यसअघि सार्वजनिक भएको फोनमा भने यूले फोल्ड नभएको अवस्थामा चलाइरहेको फोटो बाहिरिएको थियो । जसमा दायाँतिरको स्क्रिनको माथिल्लो भागमा पञ्च होल सहितको सेल्फी क्यामेरा भएको देख्न सकिन्छ ।
यो ट्रिपल फोल्डेबल फोन अनफोल्ड भएको अवस्थामा करिब १० इन्चको डिस्प्ले हुने अपेक्षा गरिएको छ, जसले यसलाई अहिलेको फोल्डेबल फोनहरूको तुलनामा ठूलो बनाउने छ । फोनको स्क्रिनमा होल-पन्च कटआउट सहितको फ्रन्ट क्यामेरा राखिएको छ, जसले यसको डिजाइनलाई अझै आकर्षक बनाउँछ ।
हालसम्म ह्वावेले यस फोनबारे आधिकारिक जानकारी बाहिर ल्याएको छैन ।
पछिल्लो अध्यावधिक: भदौ १, २०८१ १८:५८
