भिडिओमा हेर्नु होस् सडकमा गुडाउँदै आकाशमा उडाउन मिल्ने ईभी, सुरुवाती मूल्य नै सवा ४ करोड
फागुन १२, २०८१ १२:३२
काठमाडौं । अमेरिकी अटो निर्माता एलेफ एरोनटिक्सले उड्ने कारको पहिलो भिडिओ सार्वजनिक गरेको छ । हालै मात्र कम्पनीले सामाजिक सञ्जाल मार्फत कार उडेको भिडिओ बाहिर ल्याएको हो ।
अन्तर्राष्ट्रिय सञ्चार माध्यमका अनुसार यो परीक्षण क्यालिफोर्नियाको एउटा सडकमा गरिएको थियो । भिडिओमा सबैभन्दा पहिला कालो रङको विद्युतीय कार सुस्त गतिमा अगाडि बढ्छ । तर अचानक सबैलाई अचम्मित बनाउँदै यो ठाडो रूपमा उड्छ । हावामा सहजै उचालिएर अर्को कारलाई पार गर्दै अघि बढ्छ । यो दृश्य कुनै साइन्स फिक्सन फिल्मको भन्दा कम छैन ।
“यो ड्राइभ र उडान परीक्षणले सहरको वास्तविक वातावरणमा प्रविधिको महत्त्वपूर्ण दृष्टान्त प्रस्तुत गरेको छ,” एलेफका सीईओ जिम डुखोभ्नीले न्युयोर्क पोस्टलाई भनेका छन्, “यसले नयाँ यातायात सम्भव छ भन्ने कुरा प्रमाणित गरेको छ ।”
⚡️The first ever electric car flight was made by the American company Alef Aeronautics👀
— 🌚 MatTrang 🌝 (@MatTrang911) February 21, 2025
The video shows the Model A electric car driving along the road and then flying over another vehicle. The car is reportedly capable of driving 354 km and flying 177 km on a single charge.… pic.twitter.com/MrzHzzkwjK
डुखोभ्नीले अगाडि भने, “मानवताका लागि नयाँ यातायात सम्भव छ भन्ने यो परीक्षणले प्रमाणित गरेको छ ।”
यो शत प्रतिशत विद्युतीय कार हो । डेली मेलका अनुसार यो उडान ‘डिस्ट्रिब्युटेड इलेक्ट्रिक प्रोपल्सन’ नामक प्रविधिबाट सम्भव भएको हो । यस प्रणालीमा प्रोपेलर ब्लेडलाई एक जाली युक्त तहले ढाकिएको हुन्छ । जसले हावालाई सवारीसाधनभित्र सहज रूपमा प्रवाहित गर्न मद्दत गर्छ । यसैकारण कारले सन्तुलित रूपमा उडान भर्न सक्छ र सुरक्षित रूपमा अगाडि बढ्न सक्षम हुन्छ ।
डुखोभ्नीले यो अटोमोटिभ माइलस्टोनलाई सन् १९०३ मा राइट ब्रदर्सको क्रान्तिकारी किट्टी हक भिडिओसँग तुलना गरे । एलेफका प्रतिनिधिले यो परीक्षण बन्द सडकमा गरिएको र उडान मार्गमा कोही पनि खतरामा नपरेको बताएका छन् ।
अघिल्ला भिडिओमा रनवे प्रयोग गरेर उड्ने वा तारले बाँधेर उचालिएका कारहरू देखिने गरेका थिए । कुनै रोडस्टरले सडकमा गुड्दै सिधै माथि उडान भरेको दृश्य कैद भएको यो नै पहिलो पटक हो ।
क्लिपमा देखिएको प्रोटोटाइप एलेफ मोडेल जेरोको अल्ट्रालाइट भर्सन हो । व्यावसायिक भर्सनका लागि कम्पनीले दुई सिट भएको एलेफ मोडेल ए (Alef Model A) उड्ने कार प्रयोग गर्नेछ । यसको उडानको रेन्ज ११० माइल (लगभग १७७ किलोमिटर) र ड्राइभिङ रेन्ज २०० माइल (लगभग ३२२ किलोमिटर) हुनेछ । डिजाइन बुमका अनुसार यसमा अटोपाइलटिङ उडान क्षमता पनि हुनेछ ।
मोडेल एमा आठ ओटा रोटर छन् । यी रोटर फरक गतिमा घुम्न सक्छन् भने यसैको सहायताले कार विभिन्न दिशामा उड्न सक्छ । यसमा रहेका चार ओटा साना मोटरले यसलाई सामान्य विद्युतीय कारजस्तै चलाउन सक्छन् र सामान्य कार पार्किङ गरे जस्तै पार्किङ गर्न सकिन्छ ।
रिपोर्ट अनुसार सन् २०१५ देखि नै यसको निर्माण कार्य चलिरहेको छ । होन्डा, हुन्डाई, बीएमडब्लू जस्ता कम्पनीले बनाएका ईभीटोल (eVTOL) भन्दा यो फरक छ, किनकि ती हेलिकोप्टर जस्तै मात्र उड्न सक्छन् । यो मोडेल ए भने सडकमा गुड्न पनि सक्छ ।
मोडेल एको मूल्य लगभग तीन लाख अमेरिकी डलर (लगभग चार करोड १५ लाख रुपैयाँ) बाट सुरु हुने अपेक्षा गरिएको छ । ग्राहकहरूले एलेफको वेबसाइटमा १५० डलर (लगभग २० हजार रुपैयाँ) जम्मा गरेर यो कार प्रि-अर्डर गर्न सक्नेछन् ।
अहिलेसम्म यस उड्ने विद्युतीय कारका लागि ३३०० भन्दा बढी प्रि-अर्डर आइसकेको न्युयोर्क पोस्टले उल्लेख गरेको छ ।
सन् २०३५ सम्म एलेफले एलेफ मोडेल जेड नामक नयाँ भर्सन सार्वजनिक गर्ने लक्ष्य राखेको छ । यो चार जना यात्रु अटाउने, चलाउन र उडाउन सकिने सेडान हुनेछ । यसले आकाशमा २०० माइलसम्मको यात्रा तय गर्न सक्नेछ भने जमिनमा ४०० माइलको दूरी पार गर्न सक्ने कम्पनीले जनाएको छ ।
पछिल्लो अध्यावधिक: फागुन १२, २०८१ १२:४६
