आफ्नो इयरबड्स वा एयरपड्स कति समयमा अनि कसरी सफा गर्ने ?

काठमाडौं । वायरलेस प्रविधिको युगमा एप्पलको एयरपड्स वा इयरबड्स सङ्गीत र पडकास्ट सुन्नेहरूका लागि मुख्य रोजाइको प्रडक्ट हो । चार्ज टिक्ने अनि हेर्दा पनि आकर्षक देखिने भएकाले पनि यस्ता उत्पादनको माग बढ्दो छ । तर पर्दा पछाडि यी साना प्राविधिक उत्पादन ब्याक्टेरिया, इयरवाक्स र फोहोरको आश्रयस्थल हुन सक्छन् । 

यसले गर्दा तपाईँको स्वास्थ्यमा खतरा निम्तिन सक्छ । दिनहुँ प्रयोग गरिने एक्सेसरिज भए पनि एयरपड्स वा इयरबड्सको सरसफाइ पक्षलाई प्रायः बेवास्ता गरिन्छ । 

सफा एयरपड वा इयरबड केवल देखावटी मात्र नभई स्वास्थ्यका लागि पनि आवश्यक छ भन्ने कुरा जान्नु आवश्यक छ ।

तपाईँको इयरबड्समा के लुकिरहेको छ ?
तपाईँको इयरबड्समा जम्मा हुने कानेगुजी र फोहरलाई बेवास्ता गर्न सजिलो छ । तर वास्तविकता डरलाग्दो छ । ‘हाउ स्टफ वर्क्स’को हालैको गाइड अनुसार इयरबड्समा कानेगुजी, फोहोर र चिल्लो पदार्थ छिट्टै जम्मा हुन सक्छ । यसलाई जाँच वा सफा गरिएन भने कानमा सङ्क्रमण हुन सक्छ । तपाईँको कानभित्रको न्यानो तथा ओसिलो वातावरण र इयरबड्समा हुने फोहोर तथा ब्याक्टेरियाको मिश्रणले सङ्क्रमणका लागि उपयुक्त वातावरण सिर्जना हुन्छ । 

विभिन्न अध्ययन अनुसार भान्छाको कटिङ बोर्डको तुलनामा इयरबड्सले बढी ब्याक्टेरिया जम्मा गर्न सक्छ । त्यसैले इयरबड्स लामो समयसम्म टिकाउनका लागि मात्र नभई तपाईँको स्वास्थ्यका लागि पनि सफा राख्नु महत्त्वपूर्ण छ । 

इयरबड्स सफा गर्न किन जरुरी छ ?
फोहोर इयरबड्सका खतरा सङ्क्रमणमा मात्र सीमित छैनन् । स्पिकरमा जम्मा भएको फोहोरले आवाजको गुणस्तरमा पनि असर पार्न सक्छ । यसले गर्दा गीतको बेस (bass) र स्पष्टतामा कमी आउँछ । साथै जम्मा भएको फोहोरले माइक्रोफोनलाई पनि बाधा पुर्‍याउन सक्छ । जसले गर्दा फोनमा कुराकानी गर्दा आवाज स्पष्ट नहुने समस्या निम्तिन सक्छ । 

एप्पलको आधिकारिक गाइडलाइन्सले स्पिकर र चार्ज गर्ने पोर्टहरूमा दीर्घकालीन क्षति हुनबाट जोगाउन उचित सरसफाइ गर्ने तरिकाको महत्त्वमा जोड दिएको छ । खस्रो खालको सामग्री प्रयोग गर्नाले वा इयरबड्सलाई पानीमा डुबाउनाले तिनमा स्थायी रूपमा क्षति पुग्न सक्छ । र त्यसो गर्दा वारेन्टी दाबी पनि अमान्य हुन सक्छ ।

सुरक्षित रूपमा सफा गर्ने आफ्नो इयरबड्स ?

१) सबैभन्दा पहिला यी सामग्री जम्मा गर्नुहोस् 

• एउटा सुक्खा कपासको स्वाब

• नरम, रौँ नआउने कपडा (माइक्रोफाइबर)

• ७०% आइसोप्रोपाइल अल्कोहल (क्षति हुनबाट जोगाउन)

२) स्पिकरको जाली सफा गर्ने: 

सुक्खा कपासको स्वाब प्रयोग गरेर स्पिकरको जाली र माइक्रोफोन सफा गर्नुहोस् । एप्पलले कमजोर जालीलाई प्वाल पार्नबाट रोक्नको लागि सुई वा टुथपिक जस्ता धारिलो वस्तुहरू प्रयोग नगर्न सुझाव दिएको छ ।

३) सतह पुछ्ने: 

नरम, रौँ नआउने कपडा प्रयोग गरेर इयरबड्समा भएको धुलो र फोहोर सफा गर्नुहोस् । गाढा दाग छ भने कपडालाई पानीले भिजाउनुहोस् र दूषित भएको ठाउँ राम्रोसँग पुछ्नुहोस् । इयरबड्सलाई फेरि केसमा राख्नु अघि राम्ररी सुक्खा बनाउनुहोस् । 

४) चार्जिङ केस व्यवस्थापन गर्ने:

• केस पुछ्न सुक्खा कपडा प्रयोग गर्नुहोस्।

• गाढा दागका लागि कपडामा थोरै मात्रामा आइसोप्रोपाइल अल्कोहल लगाउनुहोस् ।

• चार्जिङ पोर्टभित्र कुनै पनि तरल पदार्थ जान नदिनुहोस् ।

इयरबड्स सफा गर्दा के नगर्ने ?

१) पानीमा नडुबाउनुहोस्: 

एकैछिन डुबाउँदा पनि स्पिकरहरूमा क्षति पुग्न सक्छ । त्यसैले पानीमा नडुबाउनुहोस् । 

२) धारिलो वस्तु प्रयोग नगर्नुहोस्: 

जतिसुकै मन लागे पनि स्पिकरको जाली सफा गर्न सुई वा पिनको प्रयोग नगर्नुहोस् । 

कति पटक सफा गर्ने इयरबड्स ?
यदि तपाईँले आफ्नो इयरबड्स दैनिक प्रयोग गर्नुहुन्छ भने हप्तामा कम्तीमा एक पटक सफा गर्नुपर्ने हुन्छ । कनेक्टरमा फोहोर जम्मा हुन नदिन चार्जिङ केसलाई प्रत्येक दिन केस पुछ्दा उपयुक्त हुन्छ । 

बेवास्ता गर्दा हुने परिणामहरू
आफ्नो एयरबड्स सफा गर्न बेवास्ता गर्दा सङ्क्रमणको जोखिम हुन्छ र यसले अपूरणीय क्षति निम्त्याउन सक्छ । समय बित्दै जाँदा फोहोर जम्मा भएर स्पिकर बन्द हुन सक्छन् र आवाजको गुणस्तरमा कमी आउन सक्छ । यसले गर्दा तपाईँले इयरबड नै परिवर्तन गर्नुपर्ने अवस्था आउन सक्छ । नियमित सरसफाइ गर्दा तपाईँले वेयरेबल डिभाइसमा गरेको लगानी सुरक्षित हुन्छ ।

पछिल्लो अध्यावधिक: फागुन २६, २०८१ १४:४५

टिप्पणीहरू