तपाईंका यी बानीले बिगार्दैछ ल्यापटपको ब्याट्री, जोगाउन के गर्ने ?

काठमाडौँ । ल्यापटपको सबैभन्दा ठुलो फाइदा भनेको यसलाई जहाँ पनि सजिलै बोकेर लैजान सकिन्छ । र, यो यसमा भएको ब्याट्रीको कारणले मात्र सम्भव हुन्छ । तर, ल्यापटप प्रयोग गर्दै जाँदा समयसँगै ब्याट्रीको क्षमता पनि घट्दै जान्छ । केही समयपछि नै ल्यापटप चलाउनका लागि हरेक केही घण्टामा चार्जर जोड्नुपर्ने अवस्था आउँछ । कतिपय अवस्थामा त चार्जर नजोडे प्रयोग गर्नै नसकिने परिस्थिति पनि आउँछ । 

हुन त कुनै पनि ब्याट्री सधैँका लागि टिक्दैन । तर तपाईंले यसको हेरचाह गर्ने तरिकाले यसको आयुमा ठुलो फरक पार्न सक्छ । तपाईंले कति पटक चार्ज गर्नुहुन्छ, यसलाई तातो हुन दिनुहुन्छ कि हुँदैन वा कुन चार्जर प्रयोग गर्नुहुन्छ जस्ता सामान्य कुराले तपाईंको ल्यापटपको ब्याट्री धेरै वर्षसम्म राम्रोसँग चल्ने वा चाँडै बिग्रने भन्ने कुरा निर्धारण गर्छ ।

सधैँ प्लगमा जोडेर राख्नु

यदि तपाईं दिनभरि आफ्नो ल्यापटपलाई डेस्कमा राखेर प्लग जोडी काम गर्ने व्यक्ति हुनुहुन्छ भने सधैँ चार्जमा जोडी राख्नु सुविधाजनक लाग्न सक्छ । तर यो बानीले समयसँगै तपाईंको ल्यापटपको ब्याट्री हेल्थलाई कमजोर बनाउन सक्छ ।

आजकल धेरैजसो ल्यापटपमा लिथियम-आयन ब्याट्री प्रयोग हुन्छन् र यी ब्याट्रीहरू चार्ज र डिस्चार्जको सन्तुलित चक्रमा रहँदा राम्रो काम गर्छन् । ल्यापटपलाई सधैं प्लगमा जोडेर राख्ने बानीले यसको प्राकृतिक चक्रलाई बाधा पुर्‍याउँछ । 

यसको लागि राम्रो उपाय भनेको ब्याट्रीलाई ८० प्रतिशतभन्दा माथि चार्ज नगर्नु हो । विन्डोजले चार्ज सीमित गर्ने सुविधा दिएको छैन । तर धेरै ल्यापटप निर्माताले यस्ता टुलहरू उपलब्ध गराउँछन्, जसले चार्जलाई ८० प्रतिशतमा रोक्न मद्दत गर्छन् ।

नियमित रूपमा ब्याट्रीलाई पूर्ण रूपमा रित्याउनु

जसरी ल्यापटपलाई सधैं १०० प्रतिशत चार्ज गर्नु ब्याट्रीको लागि हानिकारक हुन्छ, त्यसैगरी चार्ज गर्नुअघि यसलाई पूर्ण रूपमा शून्यमा झार्न दिनु पनि त्यति नै हानिकारक छ । यसो गर्दा ब्याट्रीको भित्री रसायनमा दबाब पर्छ र बिस्तारै यसको समग्र क्षमता घट्दै जान्छ ।