जिम मोरिसनले सगरमाथाको सबैभन्दा कठिन उत्तरी मोहडाबाट स्की गरेर रचे कीर्तिमान, हेर्नुस् भिडिओ

काठमाडौँ । अमेरिकी पर्वतारोही जिम मोरिसनले सगरमाथाको उत्तरी मोहडामा रहेको डरलाग्दो हर्नबिन कुलुआर (Hornbein Couloir) मा स्की गर्ने पहिलो व्यक्ति बनेर इतिहास रचेका छन् । यो बाटोलाई सगरमाथाको सबैभन्दा कठिन मार्ग मानिन्छ ।

मोरिसनले यो ऐतिहासिक अवतरण १६ अक्टोबरमा सम्पन्न गरेका हुन् । उनको यो सफलता भने २७ अक्टोबरमा मात्रै सार्वजनिक भयो ।

यो भूभाग ५०-डिग्रीको डरलाग्दो भिरालो छ र ९,००० फिट सिधै तल झरेको छ । उनले कूल चार घण्टा पाँच मिनेटमा आफ्नो अवतरण पूरा गरेका थिए ।

स्की पर्वतारोहणका लागि सगरमाथाको उत्तरी मोहडा सबैभन्दा ठुलो लक्ष्य हो । यसअघि हर्नबिन कुलुआरलाई स्की पर्वतारोहीहरूलाई चकमा दिने अन्तिम महान् रेखा मध्ये एक मानिन्थ्यो । यस कुलुआरमा स्की वा स्नोबोर्ड गर्ने अघिल्ला प्रयासहरू दुखद रूपमा अन्त्य भएका थिए । जसमा गम्भीर चोटपटक र मृत्युसमेत भएका थिए ।

मोरिसनले नेसनल जियोग्राफिकलाई बताएअनुसार यो ओरालो एकदमै ठाडो छ र माथिदेखि तलसम्म निरन्तर छ । र यो सानो, सौन्दर्यपूर्ण कुलुआरहुँदै जान्छ । उनले यसलाई एक माइल भन्दा लामो, विशाल, अँध्यारो र सुन्दर स्केलको रूपमा वर्णन गरे ।

उनका अनुसार एक हप्तासम्म चलेको हावाका कारण ढलानको अवस्था निकै असहज थियो । उनले भनेका छन्, "तैपनि मैले वास्तवमै उत्कृष्ट मोड र अति-डरलाग्दो, अति-सुन्दर अवतरण गर्न सफल भएँ ।" मोरिसनले यस अवतरणलाई पृथ्वी ग्रहकै सबैभन्दा उत्कृष्ट दौड भनेका छन् ।

उनका अनुसार त्यस दिनको मौसम दिनभर घाम लागेको, तल थोरै बादल लागेको र हावा लगभग नलागेको थियो । उनले यस दिनलाई संसारको चुचुरोमा जानका लागि एकदमै उत्तम हिमालयन दिन भनेका छन् ।

मोरिसनले आफ्नो यो ऐतिहासिक दिन आफ्नी दिवङ्गत साथी नेसनल जियोग्राफिक एक्सप्लोरर हिलारी नेल्सनलाई समर्पित गरे । नेल्सनको तीन वर्षअघि विश्वको आठौँ अग्लो हिमाल मनास्लुबाट खसेर मृत्यु भएको थियो ।

मोरिसनले बर्ग्सक्रन्ड (bergschrund) पार गर्दा आफू रोएको बताए । उनले भने, "मैले यति धेरै जोखिम लिएको थिएँ, तर म जीवित थिएँ । मलाई लाग्यो कि यो हिलारीको लागि श्रद्धाञ्जली हो । जुन कुरामा उनलाई गर्व हुने थियो । मैले साँच्चै उनलाई मसँगै, मलाई हौसला दिइरहेको महसुस गरेँ ।"

उनले तल ओर्लिएपछि आफ्नो टोलीमाथि खुसी र गर्व व्यक्त गर्दै भने, "म खुसी छु । म थकित छु । म धेरै भावुक छु । यो महान मिसनबाट तल आएर समाप्त भएकोमा साँच्चै उत्साहित छु र मेरो टोलीमाथि धेरै गर्व छ ।"

जिम मोरिसन एक प्रख्यात स्की पर्वतारोही हुन्, जो ल्होत्सेको पहिलो स्की अवतरण (२०१८) जस्ता महत्वपूर्ण उपलब्धिका लागि परिचित छन् । जसले उनलाई नेसनल जियोग्राफिक एडभेन्चरर अफ द इयरको उपाधि समेत दिलाएको थियो ।

उनको इतिहास रच्ने यो अवतरण ओस्कार विजेता नेसनल जियोग्राफिक एक्सप्लोरर जिम्मी चिनले कैद गरेका थिए । चिनले चाई भासारहेलीसँग मिलेर मोरिसनको यस ज्यान जोखिममा राख्ने उपलब्धिको बारेमा नेसनल जियोग्राफिक डकुमेन्ट्री निर्देशन गरिरहेका छन् ।

पछिल्लो अध्यावधिक: कात्तिक १०, २०८२ २२:५७

टिप्पणीहरू