'के तपाईं मर्नुभयो ?' नामक एप चीनमा एक्लै बस्ने युवाहरू माझ भाइरल

काठमाडौँ । चीनमा हालै एउटा अनौठो र एक प्रकारले डरलाग्दो सुनिने मोबाइल एप Are You Dead? (के तपाईं मर्नुभयो?) निकै चर्चित भइरहेको छ । विशेषगरी एक्लै बस्ने युवा पुस्तामाझ यो एप लोकप्रिय बनेको छ, जसको मुख्य उद्देश्य प्रयोगकर्ता सुरक्षित छन् वा छैनन् भन्ने कुराको निगरानी राख्नु हो ।

यो एपको अवधारणा एकदमै सरल छ । प्रयोगकर्ताले हरेक दुई दिनमा एक पटक एप खोलेर त्यहाँ रहेको एउटा ठुलो बटन थिच्नुपर्छ, जसले उनीहरू जीवित र सुरक्षित रहेको पुष्टि गर्दछ । यदि प्रयोगकर्ताले निश्चित समयसम्म बटन थिचेनन् भने, एपले तुरुन्तै उनीहरूले पहिले नै तय गरेको आकस्मिक सम्पर्क व्यक्ति (Emergency Contact) लाई सम्पर्क गर्छ र प्रयोगकर्ता समस्यामा परेको हुनसक्ने जानकारी दिन्छ ।

चीनमा पछिल्लो समय एक्लै बस्ने मानिसहरूको संख्या तीव्र रूपमा बढ्दै गएको छ । एक रिपोर्ट अनुसार, सन् २०३० सम्ममा चीनमा एक्लै बस्नेहरूको संख्या २० करोडभन्दा बढी हुने अनुमान गरिएको छ । यही एक्लोपन र 'एक्लै मरिन्छ कि' भन्ने डरका कारण धेरै युवाहरूले यो एप डाउनलोड गरिरहेका छन् ।

 

बेइजिङमा काम गर्ने ३८ वर्षीय विल्सन हाउ भन्छन्, "मलाई डर लाग्छ कि यदि मलाई केही भइहाल्यो भने म भाडाको कोठामा एक्लै मर्न सक्छु र कसैले थाहा पाउने छैनन् ।" उनले आफ्नो सुरक्षाका लागि यो एप डाउनलोड गरी आफ्नी आमालाई आकस्मिक सम्पर्क व्यक्तिको रूपमा राखेका छन् । यो एप विशेष गरी अन्तर्मुखी (introverts), मानसिक तनावमा रहेका व्यक्ति, बेरोजगार र असुरक्षित अवस्थामा रहेकाहरूका लागि उपयोगी मानिएको छ ।

 

यो एप हाल चीनमा सबैभन्दा धेरै डाउनलोड गरिने सशुल्क (paid) एप बनेको छ । अन्तर्राष्ट्रिय बजारमा Demumu नामले उपलब्ध यो एप अमेरिका, सिङ्गापुर, हङकङ, अष्ट्रेलिया र स्पेनमा पनि शीर्ष स्थानमा रहेको छ । यसको मूल्य मात्र ८ युआन (करिब १.१५ अमेरिकी डलर) राखिएको छ ।

 

यो एप सन् १९९५ पछि जन्मेका तीन जना युवाहरूको टोलीले झेङझाउ सहरबाट सुरु गरेका हुन् । उनीहरूले मात्र १,००० युआनको लागतमा बनाएको यो एपको भ्यालु अहिले करोडौँ पुगेको छ ।

 

एपको नाम Si-le-ma (Are You Dead?) चिनियाँ खाना डेलिभरी एप E-le-ma (Are You Hungry?) सँग मिल्दोजुल्दो गरी ठट्टाको रूपमा राखिएको हो । यद्यपि, धेरैले यसको नाम नकारात्मक भएको भन्दै Are You OK? वा How are you? जस्ता सकारात्मक नाम राख्न सुझाव दिएका छन् । निर्माता कम्पनी 'मूनस्केप टेक्नोलोजी' (Moonscape Technologies) ले यी सुझावहरूलाई मनन गर्दै नाम परिवर्तन गर्नेबारे सोचिरहेको बताएको छ ।

 

अब यो कम्पनीले आफ्नो सेवा विस्तार गर्दै वृद्धवृद्धाहरूका लागि पनि विशेष उत्पादन ल्याउने तयारी गरिरहेको छ, किनकि चीनको कुल जनसंख्याको २० प्रतिशतभन्दा बढी हिस्सा ६० वर्ष माथिका नागरिकहरूको छ ।

पछिल्लो अध्यावधिक: पुस २९, २०८२ ९:४

टिप्पणीहरू