भिडिओ गेम बनाउने प्रतियोगिता हुँदै, १८ वर्षसम्मका बालबालिका निःशुल्क सहभागी हुन सक्ने

काठमाडौँ । कोशी प्रदेशको राजधानी विराटनगरमा किशोरकिशोरीहरूका लागि एक विशेष भिडिओ गेम डिजाइन तथा कोडिङ प्रतियोगिता ‘क्याम्पफायर विराटनगर’ आयोजना हुने भएको छ । अरनिको ह्याकक्लब (Arniko HackClub) ले आयोजना गर्न लागेको यो कार्यक्रम नेपालकै ठुलो ‘गेम ज्याम’ (Game Jam) मध्ये एक हुने दाबी गरिएको छ ।

आयोजकका अनुसार प्रतियोगिता यही २८ फेब्रुअरीदेखि १ मार्चसम्म उद्योग सङ्गठन मोरङको भवनमा सञ्चालन हुनेछ । ओभरनाइट (रातभर चल्ने) २४ घण्टे ह्याकाथन ढाँचाको यो कार्यक्रममा सहभागीहरूले शून्यदेखि एउटा खेल्न मिल्ने भिडिओ गेम तयार पार्नुपर्नेछ ।

यस प्रतियोगितामा १३ देखि १८ वर्ष उमेर समूहका माध्यमिक तह (High School) मा अध्ययनरत विद्यार्थीहरू मात्र सहभागी हुन पाउनेछन् । कार्यक्रमका संयोजक अर्जन चौधरीका अनुसार यसमा सहभागी हुनका लागि पहिले नै कोडिङ वा गेम डिजाइन सम्बन्धी ज्ञान हुनु अनिवार्य छैन । नयाँ सिक्न चाहनेहरूलाई प्रोत्साहन गर्नका लागि कार्यक्रमकै दौरान आधारभूत प्रोग्रामिङ र गेम डिजाइन सिकाउने विशेष वर्कशपहरू पनि सञ्चालन गरिनेछ ।

क्याम्पफायर विराटनगर विश्वव्यापी ‘ह्याक क्लब’ (Hack Club) को अभियानको एक हिस्सा भएको बताइएको छ । आयोजकहरूका अनुसार यो कार्यक्रम विश्वका २०० भन्दा बढी सहरहरूमा एकैसाथ सञ्चालन हुने विश्वव्यापी अभियानसँग जोडिएको छ ।

कार्यक्रमका सह-संयोजक प्रयाश अधिकारीले यो प्रतियोगिताले स्थानीय युवाहरूलाई अन्तर्राष्ट्रिय प्रविधि क्षेत्रसँग जोड्ने र उनीहरूको वृत्ति विकासका लागि एउटा महत्वपूर्ण पाइला साबित हुने बताए ।

यो कार्यक्रम पूर्ण रूपमा नि:शुल्क रहनेछ । सहभागी विद्यार्थीहरूलाई काम गर्ने ठाउँ (Workspace), खाना र खाजाको व्यवस्था आयोजकले नै गर्नेछन् । साथै सहभागीहरूलाई विशेष टी-सर्ट, स्टिकरहरू र आफ्नै पोर्टफोलियो बनाउनका लागि नि:शुल्क .xyz डोमेन पनि प्रदान गरिने आयोजकले जनाएको छ । विजेताहरूका लागि पुरस्कारको घोषणा भने कार्यक्रमको समयमा गरिने उल्लेख छ ।

संयोजक चौधरीले यस कार्यक्रमको मुख्य उद्देश्य विद्यार्थीहरूलाई 'प्रविधिको उपभोग गर्ने मात्र नभई प्रविधि सिर्जना गर्ने' बनाउनु रहेको बताए । उनका अनुसार क्याम्पफायर विराटनगरले विद्यार्थीहरूलाई रातभरमा केही वास्तविक र नयाँ कुरा निर्माण गर्न आवश्यक वातावरण, उपकरण र मेन्टरशिप प्रदान गर्नेछ ।

प्रतियोगितामा सहभागी हुन इच्छुक १८ वर्षसम्मका विद्यार्थीहरूले campfire.hackclub.com/biratnagar मा गएर आफ्नो नाम दर्ता गराउन सक्नेछन् । विराटनगरमा पहिलो पटक यति ठुलो स्तरमा आयोजना हुन लागेको यो किशोर लक्षित गेम ज्यामले यस क्षेत्रका प्रविधि प्रेमी युवाहरूमा नयाँ उत्साह थप्ने अपेक्षा गरिएको छ ।

पछिल्लो अध्यावधिक: फागुन ६, २०८२ १०:५८

टिप्पणीहरू