एन्ड्रोइड १७ सँगै आउँदैछन् यी नयाँ परिवर्तन
फागुन ६, २०८२ १३:३३
काठमाडौँ । गुगलले आफ्नो आगामी मोबाइल अपरेटिङ सिस्टम एन्ड्रोइड १७ को पहिलो बेटा संस्करण सार्वजनिक गरेसँगै यसका नयाँ विशेषता र सुधारहरूबारे विस्तृत जानकारी बाहिर आएको छ । एन्ड्रोइड १७ को आन्तरिक कोड नाम 'सिन्नमन बन' (Cinnamon Bun) राखिएको छ । यो नयाँ संस्करण विशेष गरी कार्यक्षमतामा सुधार, ठुला स्क्रिनका लागि कस्टमाइज र सुरक्षामा केन्द्रित हुने देखिएको छ ।
एन्ड्रोइड १७ मा देखिने मुख्य परिवर्तन मध्ये कार्यक्षमता र गतिमा उल्लेख्य सुधार देखिनेछ । एन्ड्रोइड १७ मा सबैभन्दा ठुलो प्राविधिक सुधार 'मेसेज क्यु' (MessageQueue) मा गरिएको छ । गुगलले 'डेलिक्यु' (DeliQueue) नामको नयाँ लक-फ्री प्रणाली लागु गरेको छ । यसले सफ्टवेयरका विभिन्न प्रक्रियाहरूलाई एक अर्काको प्रतीक्षा नगरी सञ्चालन गर्न मद्दत गर्छ । जसका कारण एपहरूमा फ्रेम ड्रप हुने समस्या ४ प्रतिशतले र सिस्टम यूआई तथा लन्चर इन्टर्याक्सनमा फ्रेम मिस हुने समस्या ७.७ प्रतिशतले घट्नेछ । यसले गर्दा स्मार्टफोन चलाउँदा पहिलेभन्दा धेरै स्मुथ अनुभव हुनेछ । यो सुधारका कारण ब्याट्री लाइफमा समेत सकारात्मक प्रभाव पर्ने र फोन तात्ने समस्या कम हुनेछ ।
यसैगरी एन्ड्रोइड १७ मा आउन लागेको अर्को महत्त्वपूर्ण फिचर हो, 'ह्यान्डअफ' (Handoff) । यो फिचरले प्रयोगकर्तालाई एउटा उपकरणमा सुरु गरेको काम (जस्तै इमेल लेख्ने वा भिडिओ हेर्ने) अर्को नजिकैको एन्ड्रोइड उपकरणमा जहाँ छोडिएको थियो, त्यहीँबाट सुरु गर्न अनुमति दिन्छ । यो एप्पलको 'ह्यान्डअफ' फिचरसँग मिल्दोजुल्दो छ र यसले ट्याब्लेट, फोल्डेबल फोन र ल्यापटपहरू बीचको प्रयोगलाई थप सहज बनाउनेछ ।
त्यस्तै गुगलले एन्ड्रोइड १७ मार्फत ट्याब्लेट र फोल्डेबल फोनका प्रयोगकर्ताहरूका लागि कडा नियम ल्याउँदैछ । अब एप डेभलपरहरूले ठुला स्क्रिनमा एपको आकार परिवर्तन गर्न (Resizing) वा ओरेन्टेसन (Landscape/Portrait) मिलाउन सकिने सुविधालाई हटाउन पाउने छैनन् । यसले गर्दा ट्याब्लेटमा एपहरू नमिलेर देखिने समस्या समाधान हुनेछ ।
भिडिओ र फोटो प्रेमीहरूका लागि एन्ड्रोइड १७ मा विशेष सुधारहरू समेटिएका छन् । क्यासिफाई र ९टु५गुगलका 'डाइनामिक क्यामेरा सेसन' अपडेटका कारण फोटो खिच्दाखिच्दै भिडिओ मोडमा जाँदा वा लेन्स परिवर्तन गर्दा आउने सामान्य 'स्टटर' वा ढिलाइ अब हट्नेछ । साथै, यसमा नयाँ भिडिओ कम्प्रेसन VVC (H.266) को सपोर्ट पनि थपिएको छ, जसले गुणस्तर नघटाई भिडिओको फाइल साइज कम बनाउन मद्दत गर्छ ।
डिजाइनको क्षेत्रमा एन्ड्रोइड १७ मा 'मटेरियल ३ एक्सप्रेसिभ' यूआई प्रयोग हुनेछ । पिक्सेल लन्चरको सर्च बार अब थप कस्टमाइज गर्न मिल्ने किसिमको हुनेछ । प्रयोगकर्ताले सर्च बारमा रहेको एआई शर्टकटलाई आफ्नो इच्छा अनुसार जेमनाई, ट्रान्सलेट वा वेदर आइकनमा परिवर्तन गर्न सक्नेछन् ।
एन्ड्रोइड १७ को स्टेबल भर्सन सन् २०२६ को जुन महिनामा सार्वजनिक हुने अपेक्षा गरिएको छ । अहिले पिक्सेल ६ र सोभन्दा पछिल्ला मोडेलका पिक्सेल फोन प्रयोगकर्ताहरूले यसको बेटा संस्करण परीक्षण गर्न सक्छन् ।
'सिन्नमन बन' नामको अर्थ
गुगलले एन्ड्रोइड १७ को लागि सिन्नमन बन (Cinnamon Bun) नाम रोज्नुको पछाडिको कारण उसको एउटा लामो समयदेखि चल्दै आएको रोचक परम्परा र प्राविधिक क्रमलाई नै मानिएको छ । गुगलले आफ्ना एन्ड्रोइड संस्करणहरूलाई वर्णमालाको क्रम (Alphabetical order) अनुसार मिठाई वा मिठाईजन्य परिकारको नाम दिने गर्दछ ।
एन्ड्रोइड १५ को कोड नाम 'भेनिला आइसक्रिम' थियो, जुन V बाट सुरु हुन्छ । त्यसपछि एन्ड्रोइड १६ मा गुगलले नयाँ मोडेल अपनाउँदै वर्णमालाको सुरुवातमै फर्किएर B बाट सुरु हुने 'बाकलावा' (Baklava) नाम रोजेको थियो । B पछि वर्णमालाको अर्को अक्षर C आउने हुँदा एन्ड्रोइड १७ का लागि C बाट सुरु हुने 'सिन्नमन बन' नाम छानिएको अनुमान छ ।
'सिन्नमन बन' लाई सिन्नमन रोल पनि भनिन्छ । यो उत्तर युरोप र उत्तर अमेरिकामा निकै लोकप्रिय र चर्चित पेस्ट्री हो । यसमा दालचिनी र चिनीको मिश्रण प्रयोग गरिन्छ र माथिबाट चिनीको लेप लगाइन्छ ।
गुगलका आन्तरिक दस्तावेजहरूमा एन्ड्रोइड १७ को 'API level 37.0' का लागि स्पष्ट रूपमा 'CinnamonBun' कोड नाम प्रयोग गरिएको पाइए पनि सार्वजनिक रूपमा भने यसलाई केवल एन्ड्रोइड १७ मात्रै भनिनेछ ।
पछिल्लो अध्यावधिक: फागुन ६, २०८२ १३:३३
