विन्डोज ११ मा जान नचाहनेलाई खुसीको खबर, विन्डोज १० अझै १ वर्ष सुरक्षित रूपमा चलाउन पाइने

काठमाडौं । माइक्रोसफ्टले आफ्ना विन्डोज १० प्रयोगकर्ताहरूका लागि ‘एक्सटेन्डेड सेक्युरिटी अपडेट्स’ कार्यक्रम थप एक वर्ष लम्ब्याउने घोषणा गरेको छ । नयाँ तालिका अनुसार, अब प्रयोगकर्ताले सन् २०२७ अक्टोबर १२ सम्म विन्डोज १० मा सेक्युरिटी अपडेटहरू प्राप्त गर्न सक्नेछन् ।

यसअघि यो कार्यक्रम सन् २०२६ अक्टोबर १३ सम्म मात्र रहने भनिएको थियो । कम्पनीले विन्डोज ११ मा अपग्रेड नगरेका करोडौँ प्रयोगकर्ताको सुरक्षालाई ध्यानमा राख्दै शान्त रूपमा यो समयावधि थप गरेको हो । 

के हो एक्सटेन्डेड सेक्युरिटी अपडेट्स ? 

विन्डोज १० को आधिकारिक सपोर्ट सन् २०२५ अक्टोबर १४ मा समाप्त हुने भए तापनि, प्रयोगकर्ताहरूलाई मालवेयर र साइबर आक्रमणको जोखिमबाट जोगाउन माइक्रोसफ्टले यो विकल्प ल्याएको हो । यो कार्यक्रम अन्तर्गत माइक्रोसफ्ट सेक्युरिटी रेस्पोन्स सेन्टरले तोकेका महत्त्वपूर्ण र क्रिटिकल सुरक्षा अपडेटहरू मात्र उपलब्ध हुनेछन् । यद्यपि, यसमा कुनै नयाँ फिचर वा टेक्निकल सपोर्ट भने समावेश गरिने छैन । 

यो सुविधा लिनका लागि प्रयोगकर्ताको डिभाइसमा विन्डोज १० को संस्करण २२एच२ (version २२H२) र पछिल्लो अपडेट अनिवार्य रूपमा इन्स्टल भएको हुनुपर्नेछ । यस्तै, डिभाइसमा एड्मिनिस्ट्रेटर माइक्रोसफ्ट एकाउन्ट हुनुपर्ने र यो व्यक्तिगत प्रयोगका लागि मात्र मान्य हुने कम्पनीले जनाएको छ । व्यावसायिक प्रयोग, किओस्क मोड वा अन्य कमर्सियल प्रयोजनमा रहेका डिभाइसहरूका लागि यो योजना लागू नहुने कम्पनीले स्पष्ट पारेको छ । 

सेक्युरिटी अपडेट प्राप्त गर्नका लागि माइक्रोसफ्टले तीन विकल्प उपलब्ध गराएको छ । प्रयोगकर्ताले पीसी सेटिङहरू सिङ्क्रोनाइज (Sync) गरेर निःशुल्क रूपमा, १,००० माइक्रोसफ्ट रिवार्ड्स प्वाइन्टहरू प्रयोग गरेर वा एक पटकका लागि ३० अमेरिकी डलर भुक्तानी गरेर यो सेवा लिन सक्नेछन् । 

एक पटक दर्ता भएपछि एउटै लाइसेन्स १० वटासम्म डिभाइसमा प्रयोग गर्न सकिनेछ । इच्छुक प्रयोगकर्ताहरूले आफ्नो डिभाइसको सेटिङ्स (Settings) भित्र 'अपडेट एन्ड सेक्युरिटी' मा गएर दर्ता प्रक्रिया सुरु गर्न सक्नेछन् । 

विन्डोज ११ को बढ्दो प्रयोगका बावजुद ठुलो संख्यामा प्रयोगकर्ताहरू अझै विन्डोज १० मै अडिग रहेका कारण माइक्रोसफ्टले यो लचिलो नीति अपनाएको विश्लेषण गरिएको छ । सन् २०२७ पछि पनि यो अवधि थप हुने वा नहुने विषयमा भने कम्पनीले अहिले केही खुलाएको छैन ।

पछिल्लो अध्यावधिक: असार १२, २०८३ १६:१९

टिप्पणीहरू