१२० स्पोर्टस् मोडसहित साओमीको ‘मी ब्यान्ड सेभेन’ सार्वजनिक, कति पर्ला मूल्य ?
जेठ ११, २०७९ १८:९
काठमाडौं । साओमीले आफ्नो फिटनेस ब्यान्डको नयाँ भर्सन मी ब्यान्ड सेभेन भर्सन सार्वजनिक गरेको छ । मी ब्यान्ड सेभेनमा ठूलो डिस्प्ले, नयाँ वाचफेस, नयाँ फिटनेस फिचर लगायतका नयाँ अपग्रेड थप गरिएको छ ।
पहिलेको तुलनामा मी ब्यान्ड ७ मा १.६२ इन्चको डिस्प्ले उपलब्ध गराइएको छ । साथै यो ब्यान्डमा डेटा प्रिजेन्टेशन र भाषाहरूको प्रस्तुतिकरणको डिजाइन पनि परिवर्तन गरिएको छ ।
नयाँ ब्यान्डमा १०० भन्दा बढी वाचफेसहरू छन् भने यसमा १२० भन्दा बढी स्पोर्टस मोडहरू समावेश गरिएको छ ।
प्रयोगकर्ताले यो ब्यान्डमा रनिङ, वाकिङ, स्विमिङ, साइक्लिङ, स्केटबोर्डिङ लगायतका १२० भन्दा बढी स्पोर्टस मोडहरू प्रयोग गर्न सक्नेछन् ।
यसका साथै अब यो ब्यान्डले प्रयोगकर्ताको ट्रेनिङ सेसनको पनि समीक्षा गर्न सक्नेछ । साथै ब्यान्डमार्फत आफ्ना साथीहरूलाई दैनिक व्यायामका विभिन्न गतिविधिहरूमा चुनौती दिन पनि सकिनेछ ।
प्रयोगकर्ताको शरीरमा अक्सिजनको मात्रा ९० प्रतिशत कम भएमा ब्यान्ड भाइब्रेट हुनेछ, जसले प्रयोगकर्तालाई सचेत गराउनेछ ।
यो ब्यान्डमा १५ दिनसम्म ब्याट्री टिक्ने कम्पनीले बताएको छ । कालो, सुन्तला, हरियो, निलो र सेतो रंगमा उपलब्ध ब्यान्डको मूल्यमा २३९ यस्आन (४५ सय रुपैयाँ) तोकिएको छ ।
पछिल्लो अध्यावधिक: असोज २, २०७९ २२:३२
