सस्तोडिलले फोटो कपी गरेको भन्दै दराजले मिम बनाएपछि…

काठमाडौं । नेपालका दुई ठूला ईकमर्स कम्पनीबीचको घोचपेच सामाजिक सञ्जालमा छताछुल्ल भएको छ । दशैं तिहार लगायतका चाडबाड नजिकिँदै गर्दा अफरको नाममा दुई कम्पनीबीच सामाजिक सञ्जालमा जुहारी चल्न थालेको हो ।

दराज अनलाइन शपिङको फेसबुक पेजबाट सस्तो डिलले आफ्नो साइटको तस्वीर नै कपी गरेको सार्वजनिक गर्दै अर्को पटक कपी नगर्न भन्दै मिम बनाएको छ । सस्तो डिलले भने तस्वीर कपी भएको विषयमा कुनै किसिमको क्षमायाचना गरेको छैन ।

उसले उल्टै दराजको मजाकको जवाफमा तस्वीरमा आफूहरु चुकेको भए पनि डिलमा भने नचुकेको दाबी गरेको छ । नेक्सा ब्राण्डको मिस्क्चर तथा ग्राइन्डरमा दुवै ईकमर्स कम्पनीमा फरक फरक मूल्य राखिएको छ ।

दशैं धमाकाको अफरसहित दराजमा २६५० रुपैयाँ रहेको उक्त उत्पादनलाई सस्तो डिलले भने २५४९ रुपैयाँमा अफर गरेको छ । दुई कम्पनीको जुहारी चलिरहँदा नेक्सा ब्राण्डले भने सित्तैको प्रचार पाएको छ ।

पछिल्लो अध्यावधिक: असोज २, २०७९ २२:३३

टिप्पणीहरू