अन्य सबैले इन्टरनेट बजार विस्तार गर्दा भएकै ग्राहक गुमाउँदै नेपाल टेलिकम

काठमाडौं । इन्टरनेट सेवाको प्रयोग बढ्दै जाँदा सेवा प्रदायकहरूबीच नयाँ ग्राहक बढाउने र प्रतिस्पर्धी कम्पनीको बजार खोस्ने होड नै चलेको छ । यस्तोमा प्रायः सबैजसो इन्टरनेट सेवाप्रदायकले ग्राहक सङ्ख्या बढाइरहेका छन् ।

तर सरकारी स्वामित्वको दूरसञ्चार कम्पनी नेपाल टेलिकमले भने पहिलो पटक आफ्ना भएकै इन्टरनेट ग्राहक समेत जोगाउन सकेको छैन । नेपाल दूरसञ्चार प्राधिकरणको तथ्याङ्क अनुसार अन्य सबै कम्पनीहरूले इन्टरनेट ग्राहक बढाउँदै आइरहेकोमा टेलिकमले भने गएको एक वर्ष वर्षको अवधिमा १९ हजार २५ ग्राहक गुमाएको देखिन्छ ।

गत वर्ष तीन लाख आठ हजार ७९१ ग्राहक रहेको कम्पनीमा यस वर्षको कात्तिकसम्ममा घटेर दुई लाख ८९ हजार ७६६ ग्राहक सीमित हुन पुगेका छन् ।

 

इन्टरनेट सेवाप्रदायकहरूको ग्राहक आधार

सेवाप्रदायक	२०७५	२०७६	२०७७	२०७८	२०७९
वर्ल्डलिङ्क	251954	338,054	422,199	550579	702998
भायानेट	60325	90,011	123,712	155769	248498
सुबिसु	58,737	98,023	168,890	243733	243121
नेपाल टेलिकम	207,508	233,289	269,192	308791	289766
क्लासिक टेक	40669	81,515	115,876	188303	253752
वेब सर्फर	15,517	18,839	29,671	74042	117889
डिशहोम	0	0	0	38474	183558
सीजीनेट	0	0	0	5721	39506
अन्य	94119	115521	170584	271752	365937
कूल	728829	975,252	1,300,124	1837164	2445025

स्रोतः नेपाल दूरसञ्चार प्राधिकरण

 

निजी कम्पनीमा ग्राहक गुमाउने सुबिसु एक्लो

बजारमा सेवाप्रदायकबीच प्राइस वार तथा स्पिड वार चल्दा निजी इन्टरनेट सेवाप्रदायक सुबिसुले पनि आफ्नो बजार गुमाएको छ । गत वर्ष ४४ प्रतिशतले नयाँ ग्राहक वृद्धि गरेको कम्पनीले यस वर्ष भने ६१२ ग्राहक गुमाएको हो ।

यद्यपि प्रतिशतको हिसाबले यो शून्य दशमलव २५ प्रतिशत मात्रै हो । अन्य प्रतिस्पर्धीले दोहोरो-तेहरो अङ्क प्रतिशतमा बजार विस्तार गरिरहँदा सुबिसुका लागि यो राम्रो सङ्केत भने अवश्य पनि होइन ।

 

सबैभन्दा छिटो बजार विस्तार गर्नेमा सीजी र डिशहोम

सेवाप्रदायकहरू मध्ये तेहरो अङ्क प्रतिशतमा ग्राहक विस्तार गर्नेमा सीजीनेट र डिशहोम गरी दुई ओटा कम्पनी मात्रै छन् । २०७८ कात्तिकमा पाँच हजार ७२१ ग्राहक रहेको सीजीले पाँच गुणाभन्दा बढी अर्थात ५९०.५४ प्रतिशतले बजार विस्तार गर्दै ग्राहक आधार ३९ हजार ५०६ पुर्‍याएको छ ।

त्यस्तै गत वर्ष ३८ हजार ४७४ ग्राहक रहेको डिशहोम फाइबरनेटले ३७८ प्रतिशतको वृद्धिमार्फत ग्राहक सङ्ख्या एक लाख ८३ हजार ५५८ पुर्‍याएको छ ।

 

नयाँ ग्राहक थप्नेमा वर्ल्डलिङ्क अझै नम्बर वान

देशकै सबैभन्दा ठूलो इन्टरनेट सेवाप्रदायक कम्पनी वर्ल्डलिङ्कको ग्राहक विस्तार गत वर्षको तुलनामा झन्डै तीन प्रतिशतले खस्किएको छ । यद्यपि नयाँ थपिन ग्राहक सङ्ख्याको हिसाबले भने कम्पनी अझै नम्बर वानमा नै रहेको छ ।

वर्ल्डलिङ्कले २०७८ कात्तिकदेखि यताको एक वर्षमा एक लाख ५२ हजार ४१९ नयाँ ग्राहक थप गरेको छ । जब कि दोस्रो धेरै नयाँ ग्राहक बनाउने डिशहोममा एक लाख ४५ हजार ८४ थप ग्राहक जोडिएका छन् ।

त्यसपछि क्रमशः भायानेटमा ९२ हजार ७२९, क्लासिक टेकमा ६५ हजार ४४९, वेबसर्फरमा ४३ हजार ८४७ र सीजीनेटमा ३३ हजार ७८५ नयाँ ग्राहक थपिएको देखिन्छ । समग्रमा गएको एक वर्षमा ३३ प्रतिशत अर्थात छ लाख सात हजार ८६१ ओटा नयाँ ग्राहक इन्टरनेट सेवामा  थपिएका छन् । 

पछिल्लो अध्यावधिक: फागुन १५, २०७९ १७:४३

टिप्पणीहरू