९७० बाट सुरु हुने नम्बरमा ओटीपी उपलब्ध गराउन सेवाप्रदायकलाई प्राधिकरणको अनुरोध
असार १७, २०८० ९:१७
काठमाडौं । नेपाल दूरसञ्चार प्राधिकरणले ९७० बाट सुरु हुने नम्बरमा वान टाइम पासवार्ड (ओटीपी) उपलब्ध गराउन सेवाप्रदायकलाई अनुरोध गरेको छ ।
प्राधिकरणले खुला गरेको नयाँ नम्बरिङ रेन्ज ९७० बाट सुरु भएका मोबाइल नम्बरमा ओटीपी नआउने समस्या अझै समाधान हुन सकेको छैन ।
अझै पनि यो रेन्जबाट सुरु हुने मोबाइल नम्बरमा ओटीपी लगायत मोबाइल एप र वेबमा आधारित सेवाहरू लिन साइन अप गर्ने समस्या पनि रहेको छ ।
सो समस्याको समाधान सम्बन्धित सेवाप्रदायकले नै गर्नुपर्ने प्राधिकरणले जनाएको छ । कम्पनीहरूले यो नम्बरलाई आफ्नो प्रणालीमा समावेश नगराउँदा यस्तो समस्या आएको हो ।
एक सूचना जारी गर्दै प्राधिकरणले सेवाप्रदायकलाई ९७० बाट सुरु हुने नम्बरमा अन्य मोबाइल नम्बर सरह सेवा उपलब्ध गराउन अनुरोध गरेको हो । एनसेल आजियटाले ९७० बाट सुरु हुने नयाँ नम्बर उपलब्ध गराउँदै आएको छ ।
पछिल्लो अध्यावधिक: असार १७, २०८० ९:१७
