नेपालबाटै टिकटकमा जागिर खाने मौका, यसरी दिनुहोस् आवेदन

काठमाडौं । टिकटकले नेपालका लागि पब्लिक पोलिसी म्यानेजर (ग्लोबल पब्लिक पोलिसी) पदमा आवेदन माग गरेको छ । कम्पनीको दुबई कार्यालयले सो पदका लागि दरखास्त आह्वान गरेको हो ।

हालै मात्र नेपालमा महिनौं लामो प्रतिबन्ध पश्चात् पुनः सञ्चालनमा आएको टिकटकले आफ्नो प्रतिबद्धता अनुरूप नेपालका लागि कर्मचारी भर्ना प्रक्रिया सुरु गरेको बुझ्न सकिन्छ । कति कति सङ्ख्यामा कर्मचारी भर्ना गर्न लागिएको भन्ने विषय चाहिं टिकटकले खुलाएको छैन ।

छोटो मोबाइल भिडिओ सामग्रीका लागि विश्वकै चर्चित एप टिकटकले रचनात्मकतालाई प्रेरित गर्नुका साथै मनोरञ्जनलाई आफ्नो मूल लक्ष्य बताउने गरेको छ ।

अमेरिकाको लस एन्जलस र सिङ्गापुरमा ग्लोबल हेडक्वार्टर रहेको यो कम्पनी अन्तर्गत न्युयोर्क, लन्डन, डब्लिन, पेरिस, बर्लिन, दुबई, जकार्ता, सियोल र टोकियोमा कार्यालयहरू रहेका छन् । जतिसुकै कठिन भए पनि प्रत्येक चुनौती आफ्ना लागि अवसर भएको बताउँदै टिकटकले कर्मचारीलाई सिकाई, नवीनता र टिमको रूपमा वृत्ति विकास जस्ता अवसर रहेको बताएको छ ।

टिकटकको सरकारसँगको सम्बन्ध र सार्वजनिक नीति टिम अन्तर्गत खुलाइएको यो पदमा रहने कर्मचारीमाथि सरकारी मामिला र सरकारसँगको सम्बन्धलाई लिएर जिम्मेवारी निर्वाह गर्नुपर्ने हुन्छ । नीति तथा समस्यामा दक्खल भएको, जोखिम तथा सङ्कट व्यवस्थापन, आउटरिच, सहकार्य र साझेदारी जस्ता क्षेत्रमा सो पदमा रहने कर्मचारीले काम गर्नुपर्नेछ ।

मूलतः टिकटकको लागि विश्वास आर्जन तथा कायम राख्नुका साथै त्यसको व्यवस्थापन एवं टिकटकमाथिको राजनीतिक, कानुनी, नियामकीय चुनौती सामना गर्नुपर्ने जिम्मेवारी समेत निभाउनु पर्ने हुन्छ ।

यस्तो हुनेछ जिम्मेवारी

-सरकार, नीति निर्माता र मुख्य विचारकहरूसँग सम्बन्ध बनाउने र कायम राख्ने ।

- टिकटक र सोको क्रियटर कम्युनिटीका महत्त्वपूर्ण विषय वस्तुमा नीति निर्माताहरूलाई संलग्न गराउने रणनीति कार्यान्वयन गर्ने ।

- सान्दर्भिक नीतिगत प्रवृत्ति र कानुनी प्रावधान पहिचान, अनुगमन र विश्लेषण गर्ने ।

- जनसम्पर्क, कानुन, उत्पादन, इन्जनियरिङ जस्ता आन्तरिक टिमहरूबीच सहकार्य गर्ने ।

- औद्योगिक सङ्घ संस्था, प्राज्ञिक संस्था र गैरसरकारी संस्थासँग अर्थपूर्ण सम्बन्ध कायम राख्ने ।

केके चाहिन्छ योग्यता ?

सार्वजनिक नीति, सरकारी सम्बन्ध र पैरवी सम्बन्धी कार्यमा प्रत्यक्ष अनुभव भएको ।

- न्यायिक प्रक्रिया र प्रविधि नीतिको ज्ञान भएको ।

- अङ्ग्रेजी र नेपाली दुवैमा व्यावसायिक स्तरको लेखन, पठन र कुराकानी गर्न सक्ने ।

- राजनीति शास्त्र, आन्तरिक मामिला, सरकार, सार्वजनिक मामिला लगायत सम्बन्धित क्षेत्र वा सो सरहका विषयको डिग्री वा सो सरहको प्रयोगात्मक अनुभव ।

- अन्तर्राष्ट्रिय प्रविधि कम्पनी तथा अन्तर्राष्ट्रिय सङ्घ संस्थामा काम गरेको अनुभव भएकोलाई प्राथमिकता दिइने ।

टिकटकको रोजगारीको विषयमा थप जानकारी लिन तथा आवेदन दिन यहाँ क्लिक गर्नुहोस् । 

पछिल्लो अध्यावधिक: भदौ २७, २०८१ १८:३

टिप्पणीहरू